06.06.2026 | 10:00
Այսօր Հայաստանում լռության օր է
ՄԱԿ-ի ԱԽ-ն չի ընդունել Իսրայելի ու Պաղեստինի վերաբերյալ ԱՄՆ-ի ու ՌԴ-ի բանաձևերը
Քաղաքականություն
26.10.2023 | 12:25
ՄԱԿ-ի Անվտանգության խորհուրդը նախօրեին չի ընդունել Մերձավոր Արևելքի իրավիճակի վերաբերյալ առաջարկված բանաձևերից որևէ մեկը։ Ռուսաստանն ու Չինաստանը վետո են դրել ամերիկյան նախագծի վրա, իսկ ռուսական փաստաթուղթը բավարար թվով ձայներ չի ստացել, գրում է DW-ի ռուսական ծառայությունը։
ԱՄՆ-ի կողմից առաջարկված բանաձևի օգտին քվեարկել է ԱԽ 10 անդամ, երկու երկիր՝ Մոզամբիկն ու Բրազիլիան ձեռնպահ են մնացել։ Չինաստանից ու ՌԴ-ից զատ՝ դեմ է եղել ԱՄԷ-ն։
Մոսկվայի տարբերակը պաշտպանել է չորս երկիր, իսկ երկուսը դեմ են քվեարկել՝ Մեծ Բրիտանիան ու ԱՄՆ-ը։ Անվտանգության խորհրդի ևս ինը անդամներ ձեռնպահ են մնացել քվեարկությունից։
ՌԴ-ի ու ԱՄՆ-ի կողմից առաջարկված բանաձևերում դատապարտվում էր բռնությունը, այդ թվում՝ Իսրայելի վրա ՀԱՄԱՍ-ի հարձակումը ու կոչ արվում մարդասիրական օգնություն տրամադրել: Միևնույն ժամանակ, Ռուսաստանը հորդորում էր «անհապաղ, կայուն և լիովին հարգված հրադադար հաստատել՝ հումանիտար նկատառումներով», նաև Իսրայելից պահանջում չեղարկել Գազայի հատվածի բնակիչներին անկլավի հարավից տարհանելու հրամանը։
Ամերիկյան նախագծում շեշտվում էր ցանկացած երկրի ինքնապաշտպանության իրավունքը և կոչ արվում պահպանել միջազգային իրավունքը, դադարեցնել ահաբեկչության ֆինանսավորումը,«մարդասիրական դադարներ» հայտարարել, սակայն ԱՄՆ-ի տարբերակը, ի տարբերություն ռուսականի, հրադադարի կոչ չի պարունակում։
