Բողոքի նոտա՝ ՌԴ-ին․ ինչու է Մոսկվան գնում Երևանի հետ հարաբերությունները լարելու ճանապարհով. ՏԵՍԱՆՅՈՒԹ

Հայաստանը բողոքի նոտա է հանձնել Ռուսաստանի դեսպանին․ Սերգեյ Կոպիրկինը երեկ է կանչվել Հայաստանի ԱԳ նախարարություն՝ ռուսական Առաջին ալիքով հեռարձակված «Նիկոլ Փաշինյան. աղետ բերողը» վերնագրով հաղորդման առնչությամբ։ Պաշտոնական Երևանն անընդունելի ու վիրավորական է համարել հաղորդման ընթացքում Հայաստանի բարձրաստիճան պաշտոնյաների հասցեին հնչած արտահայտությունները։

Հաջորդ անգամ նման բան անելուց առաջ Ռուսաստանը թող երկու անգամ մտածի․ այսպես է արձագանքում ԱԺ նախագահ Ալեն Սիմոնյանը հաղորդմանը՝ նկատելով, որ սա նման առաջին դեպքը չէր։

«Իրենք ինչ-որ բաներ են անում, փորձում են ինչ-որ բաներ անել, որոնք մեր հասարակության մեջ հակառակ էֆեկտն են տալիս, և ես չգիտեմ՝ իրենց խորհրդատուներն ովքեր են»,- հայտարարում է Սիմոնյանը։

Արդյո՞ք Երևանի և Մոսկվայի փոխադարձ քննադատությունն այն մասին է, որ երկկողմ հարաբերությունները փոփոխվել են։ Սիմոնյանն ուղիղ չպատասխանեց հարցին։

«Ես կարծում եմ՝ այդ հարցը ճիշտ է տալ ռուսական կողմին, որովհետև հայկական կողմը մշտապես իրեն պարկեշտ հռետորաբանության մեջ է պահել ու երբևիցե իրեն ոչ դաշնակցային և ոչ գործընկերային ձևով չի դրսևորել»,- ասաց նա։

Ռուսական կողմը կոշտ հայտարարություններից հետո անցել է գործուն քայլերի․ երեկ ՌԴ Պետդումայի խոսնակ Վյաչեսլավ Վոլոդինը հայտարարել է, թե որոշել են անորոշ ժամանակով հետաձգել հայկական վարորդական վկայականները ճանաչելու մասին օրինագծի քննարկումը, քանի որ Հայաստանի Ազգային ժողովի պատգամավորները և իշխանությունները որևէ քայլ չեն արել ռուսաց լեզվին կարգավիճակ տալու հարցով։ ՔՊ-ական պատգամավոր Վաղարշակ Հակոբյանի խոսքով՝ դրանք մեկ օրվա անելիքներ չեն, ձգձգելու դիտավորություն չկա։

Անվտանգային քաղաքականության հետազոտական կենտրոնի ղեկավար Արեգ Քոչինյանի գնահատմամբ՝ Ռուսաստանն անցել է դիվերսիայի ու սադրանքի, և ռուսական կողմի քայլերն ամենևին կապ չունեն Հայաստանի գործողությունների հետ։

«Հայ-ռուսական հարաբերությունները սրվում են կոնկրետ նպատակով՝ Հայաստանից պատասխան սրում ստանալու համար, որպեսզի դրանից հետո արդարացում ունենան, թե իրենք ինչու չեն միջամտում, եթե, օրինակ, սրվում է հարաբերությունը հայ-ադրբեջանական սահմանին,- մեկնաբանում է Քոչինյանը։

Ռուսական կողմի գործողություններում միտում կա՞, թե՞ ոչ․ իշխանական պատգամավոր Վաղարշակ Հակոբյանը հստակ գնահատական չտվեց, բայց և շեշտեց՝ նորմալ է, երբ դեսպանը կանչվում է ԱԳՆ, դա դիվանագիտական գործընթաց է։

Անկախ նրանից, թե ինչ կանի Հայաստանը, միևնույն է, սահմանային իրավիճակի հնարավոր սրման դեպքում ռուսական կողմը չի օգնելու Հայաստանին՝ կարծում է Արեգ Քոչինյանը։ Նրա խոսքով՝ Հայաստանը պիտի դուրս գա ՀԱՊԿ-ից, մինչդեռ Վաղարշակ Հակոբյանը վերահաստատում է՝ Հայաստանն արտաքին քաղաքական վեկտոր չի փոխում, շարունակում է մնալ ՀԱՊԿ ու ԵՏՄ անդամ, բայց և շատ են հարցերը գործընկերներին՝ նաև ռազմական համագործակցության մասով։ Հայ-ռուսական հարաբերությունների լարման ֆոնին պարզ չէ՝ արդյո՞ք Մոսկվան կընդունի նոր դեսպանի՝ իշխող «Քաղաքացիական պայմանագրի» պատգամավոր Գուրգեն Արսենյանի թեկնածությունը։ Պատգամավոր հերքել էր շրջանառվող տեղեկությունները, թե Մոսկվան մերժել է իր թեկնածությունը։

Մանրամասները՝ տեսանյութում։

Արփի Հակոբյան