07.09.2026 | 09:34
ՀՀ տարածքում ավտոճանապարհներն անցանելի են
ԱՄՆ-ից F-16-եր են ժամանել Մերձավոր Արևելք․ Ավստրալիան նույնպես զորք է ուղարկում տարածաշրջան
Քաղաքականություն
25.10.2023 | 10:39
ԱՄՆ Պաշտպանության նախարարության խոսնակ, բրիգադային գեներալ Պատրիկ Ռայդերը հայտնել է, որ Ազգային գվարդիայի 119-րդ կործանիչների ավիաջոկատը ժամանել է Մերձավոր Արևելքի տարածաշրջան։ Էսկադրիլիան բաղկացած է F-16 կործանիչներից, գրում է BBC-ի ռուսական ծառայությունը։
Պենտագոնը, սակայն, չի հայտնել, թե կոնկրետ որտեղ է այն տեղակայվելու:
Ռայդերի խոսքով՝ փոխանցումն իրականացվել է Մերձավոր Արևելքում ԱՄՆ-ի շահերին սպառնացող վտանգների զգալի աճի ֆոնին:
«Մենք մոտ ապագայում տարածաշրջանում ԱՄՆ-ի ուժերի և անձնակազմի դեմ ավելի զգալի էսկալացիայի հավանականություն ենք տեսնում, որը գալիս է Իրանի վստահված անձանցից և, ի վերջո, հենց Իրանից»,- Ռայդերի խոսքերն է մեջբերում Associated Press-ը:
Պենտագոնի խոսնակը հիշեցրել է, որ վերջին շրջանում Իրաքում և Սիրիայում ԱՄՆ օբյեկտների և զինվորականների վրա առնվազն 13 հարձակում է տեղի ունեցել։ Ըստ նրա՝ ԱՄՆ-ը չի հապաղի վճռական գործողությունների դիմելու հարցում, եթե անհրաժեշտ լինի տարածաշրջանում իր ուժերն ու շահերը պաշտպանելու համար։
Միաժամանակ, հայտնի է դարձել, որ Ավստրալիան նույնպես զորքեր և ռազմատրանսպորտային ինքնաթիռներ է ուղարկում Մերձավոր Արևելք՝ տարածաշրջանում իր քաղաքացիների և իրավիճակի հետագա վատթարացման հետ կապված մտահոգության պատճառով։
Ավստրալիայի պաշտպանության նախարար Ռիչարդ Մարլսը ավստրալական ABC հեռուստաալիքին տված հարցազրույցում ասել է, որ ներգրավված կլինեն «զգալի թվով» զորքեր, սակայն չի հստակեցրել, թե որտեղ են դրանք տեղակայվելու:
