10.04.2026 | 14:41
Ադրբեջանում մարտավարական զորավարժություններ են անցկացվում
Մարտեր Ավդեևկայի համար. Ուկրաինայի իշխանությունները տարհանում են իրականացնում
Քաղաքականություն
24.10.2023 | 18:22
Ռուսական բանակը մեծ կորուստներ է կրում Ավդեևկայի մոտ, հայտնում են Կիևից։ Դոնեցկի մոտ գտնվող այս քաղաքը, որտեղ ավելի քան 30 հազար մարդ էր ապրում մինչև լայնամասշտաբ պատերազմի սկիզբը, դարձել է ռազմաճակատի ամենաթեժ կետերից մեկը, գրում է Euronews-ը։
Ռուսական զորքերը փորձում են շրջապատել Ուկրաինայի զինված ուժերին և գնդակոծում են Ավդեևկա տանող ճանապարհը։ Ուկրաինայի ոստիկանությունը տեղի բնակիչներին տարհանում է ավելի ապահով շրջաններ։
«Առողջություն եմ մաղթում ձեզ, սիրելի՛ ուկրաինացիներ, ուկրաինուհիներ: Կարճ հաշվետվություն այս օրվա համար: Նիստ եմ անցկացրել։ Հարցը, ըստ էության, միակն է: Իրավիճակը մեր բոլոր ուղղություններում։ Ռազմաճակատում։ Ավդեևկայում: Մենք հատկապես շնորհակալ ենք այս ուղղությամբ կռվող զինվորներին: Դիմացկունությունն այնտեղ՝ ուժ է ամբողջ Ուկրաինայի համար»,- երեկոյան տեսաուղերձում ասել է Ուկրաինայի նախագահ Վլադիմիր Զելենսկին։
Կիրակի Ավդեևկայի ուղղությամբ ավիահարվածների հետևանքով զոհվել է երեք մարդ: Քաղաքում ավերվել են բնակելի շենքեր, սննդի պակաս կա։ Միաժամանակ, չնայած ամենօրյա գնդակոծություններին՝ ավելի քան 1500 մարդ շարունակում է մնալ քաղաքում։ Նրանք մարդասիրական օգնություն են ստանում կամավորների կողմից:
Մյուս քաղաքներում ևս հրետակոծությունները չեն դադարում։ Ավելի վաղ, ինչպես հայտնել էին Կիևում, ռուսական հրթիռը խոցել էր Խարկովի մոտ գտնվող «Նոր փոստի» գրասենյակը։ Զոհվել է 6, վիրավորվել՝ 17 մարդ։
