30.04.2026 | 14:49
ԱՄՆ փոխդեսպանը AmCham-ի ժողովում կարևորել է հայ-ամերիկյան տնտեսական կապերի խորացումն ու ներդրումային աճը
Բաքվի դեմ պատժամիջոցներ սահմանելու՝ Բունդեսթագի հանձնաժողովի նախագահի հայտարարությունն Ադրբեջանի Մեջլիսի դժգոհությունն է հարուցել
Քաղաքականություն
24.10.2023 | 23:04
Ադրբեջանի Միլի Մեջլիսի միջազգային և միջխորհրդարանական հարաբերությունների հանձնաժողովը դժգոհություն է հայտնել Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթի՝ Հայաստանում Հարավային Կովկասում իրավիճակի գնահատման վերաբերյալ հայտարարության առնչությամբ։
«Ցավալի է Ռոթի կողմից Երևանում արված կողմնակալ և խեղաթյուրող հայտարարությունը։ Մենք հերթական անգամ ականատես ենք լինում, թե ինչպես են Հայաստանի հովանավորները իրենց կեղծ մեղադրանքներով մոլորեցնում միջազգային հանրությանը։ Ցավալի է, որ Բունդեսթագում ապակառուցողական ուժերի ազդեցությունն ու ճնշումը նպաստում են նման կողմնակալ քայլերին և նման հայտարարությունների ընդունմանը»,- ասվում է Մեջլիսի հանձնաժողովի հայտարարության մեջ։
Մեջլիսն Ադրբեջանի դեմ պատժամիջոցներ կիրառելու սպառնալիքները համարում է «քաղաքական կեղծավորություն և երկակի ստանդարտների վառ օրինակ» ու «կտրականապես մերժում է Ռոթի հայտարարությունները»։
Հավելենք, որ Ռոթը Երևանում մամուլի ասուլիսում հայտարարել էր, որ եթե Ադրբեջանը չդադարեցնի իր ագրեսիվ ու հրահրող քաղաքականությունը, անշուշտ, պատժամիջոցներ կկիրառվեն։
«Պատժամիջոցներն այժմ սեղանի վրա են, մշակման փուլում են։ Այն հավասարության քաղաքականությունը, որ մենք վարում էինք երիտասարդ, ժողովրդավար Հայաստանի և հարուստ, ավտոկրատ Ադրբեջանի հետ, ձախողվել է։ Սա նշանակում է, որ մենք պետք է վերաձևակերպենք մեր քաղաքականությունը և ունենանք հստակ դիրքորոշում»,- ասել է գերմանացի պատգամավորը՝ միաժամանակ հավելելով, որ ԵՄ անդամ 27 երկրների միջև այս հարցում դեռևս համաձայնություն չկա։
Էմմա Չոբանյան
