Քաղաքականություն
23.10.2023 | 21:39
Կովկասյան տարածաշրջանում կայունության ապահովումը հնարավոր է Ադրբեջանի և Հայաստանի միջև խաղաղության պայմանագրի կնքմամբ։ Այս մասին հայտարարել է Թուրքիայի արտգործնախարար Հաքան Ֆիդանը Թեհրանում, որտեղ այսօր տեղի է ունեցել Հարավային Կովկասի տարածաշրջանային խորհրդատվական «3+3» հարթակի շրջանակում Հայաստանի, Իրանի, ՌԴ-ի, Թուրքիայի և Ադրբեջանի ԱԳ նախարարների մակարդակով հանդիպումը։
«Տարածաշրջանային խաղաղության և կայունության ուղին անցնում է Ադրբեջանի և Հայաստանի միջև համապարփակ խաղաղության պայմանագրի կնքմամբ»,- Ֆիդանի խոսքերն է մեջբերում Թուրքիայի ԱԳՆ-ն։
Թուրք պաշտոնյան նշել է, թե Անկարան, իբր, հանդես է գալիս տարածաշրջանի խնդիրները երկխոսության միջոցով լուծելու օգտին։
«Թուրքիան տարածաշրջանի խնդիրները երկխոսության միջոցով լուծելու կողմնակիցն է՝ տարածաշրջանում կայուն խաղաղություն ապահովելու համար»,- ասել է Ֆիդանը՝ մատնանշելով 3+3 հարթակի կարևորությունը՝ «միջազգային հանրությանը ցույց տալու համար, թե ինչպես են տարածաշրջանի երկրները կարողանում ինքնուրույն լուծել իրենց խնդիրները»։
Նրա կարծիքով՝ «հուսադրող է, որ վերացվել են տարածաշրջանում համագործակցության և բարեկամության հաստատման խոչընդոտները»։ Թուրքիայի ԱԳ նախարարը նշել է նաև, որ կարգավորման գործընթացի և Կովկասում խաղաղության գործընթացի արագացումը կնպաստի տարածաշրջանի տրանսպորտային կապերի բացմանը։
