15.01.2026 | 23:17
Ստեփանծմինդա-Լարս ավտոճանապարհը փակ է բեռնատարների համար
Ըստ Լավրովի՝ ՀՀ-ի և Ադրբեջանի միջև հակամարտությունը «հիմնականում լուծված է»
Քաղաքականություն
23.10.2023 | 21:26
Ադրբեջանի և Հայաստանի միջև հակամարտությունը հիմնականում լուծված է, այժմ կողմերին մնում է միայն հետագա գործնական քայլեր ձեռնարկել հարաբերություններն ամբողջությամբ կարգավորելու համար։ Այս մասին լրագրողներին ասել է ՌԴ ԱԳ նախարար Սերգեյ Լավրովը Թեհրանում «3+3» ձևաչափով նախարարական հանդիպման արդյունքներով հրավիրված ասուլիսում։
«Հակամարտությունը մեծ մասամբ լուծված է։ Երկու կողմերն էլ համակարծիք են եղել, որ Ղարաբաղը պատկանում է Ադրբեջանին, և դա հիմնական չլուծված խնդիրն էր։ Այժմ, իհարկե, մնում են գործնական քայլեր հարաբերությունները լիարժեք կարգավորելու համար, առաջին հերթին խաղաղության պայմանագրի նախապատրաստման, սահմանների սահմանազատման և առանց խոչընդոտների տրանսպորտային տնտեսական կապերի հաստատման համար, ինչպես այդ մասին պայմանավորվել են ՌԴ-ի, Ադրբեջանի ու ՀՀ նախագահների հանդիպումների ժամանակ»,- հայտարարել է Լավրովը։
«Վերջին մեկ տարվա ընթացքում փորձեր են եղել (շարունակվում են) ներթափանցել սահմանազատման գործընթաց [Հայաստանի և Ադրբեջանի միջև սահմանի] նախ և առաջ Եվրամիությունից, և որոշ չափով՝ նաև Միացյալ Նահանգներից»,- հավելել է ՌԴ դիվանագիտական գերատեսչության ղեկավարը։
Լավրովի խոսքով՝ Բրյուսելն ու Վաշինգտոնը շարունակում են ՀՀ-ի և Ադրբեջանի միջև սահմանների սահմանազատման գործընթացում «միջամտելու փորձերը»։
