30.04.2026 | 14:49
ԱՄՆ փոխդեսպանը AmCham-ի ժողովում կարևորել է հայ-ամերիկյան տնտեսական կապերի խորացումն ու ներդրումային աճը
ՄԻՊ-ը՝ Սամվել Շահրամանյանի՝ «գանգդ կկոտրեմ» հայտարարության մասին
Հասարակություն
20.10.2023 | 23:01
Հայաստանում Արցախի ներկայացուցչության շենքի մոտ բողոքի ակցիայի ժամանակ Արցախի նախագահ Սամվել Շահրամանյանը ակցիա իրականացնողներից մեկին ասել էր՝ «Կյամ հեսա գանգդ կոտրեմ ըտե»։
Շահրամանյանի խոսույթի, քաղաքացուն ուղղված բռնության կոչի մասով Մարդու իրավունքների պաշտպանի խորհրդական Արթուր Ասլանյանը Factor.am-ին հայտնեց. «Մարդու իրավունքների պաշտպանի աշխատակազմն այսօր իրականացրել է Հայաստանում Լեռնային Ղարաբաղի մշտական ներկայացուցչության մոտ տեղի ունեցած բողոքի ակցիայի մշտադիտարկում, իրականացվում են ուսումնասիրություններ: Միևնույն ժամանակ, պաշտպանը հատուկ ընդգծում է, որ ատելության խոսքի ցանկացած դրսևորում պետք է բացառվի հանրային խոսույթից»,- ասաց Ասլանյանը։
Նշենք, որ Արցախի ներկայացուցչության տարածքից 4 անձ ձերբակալվել և տեղափոխվել է ոստիկանության Արաբկիրի բաժին՝ ֆիզիկական ներգործության անմիջական հիմնավոր կասկածով։ ՄԻՊ Անահիտ Մանասյանի հանձնարարությամբ արագ արձագանքման խումբը մեկնել է ոստիկանության Արաբկիրի բաժին, հանդիպել ազատությունից զրկված անձանց:
Հավելենք, որ իրավապահ մարմնից չհաջողվեց պարզել՝ ուսումնասիրո՞ւմ են Շահրամանյանի հայտարարությունը, թե՞ ոչ․ ՔԿ խոսնակին ուղղված հեռախոսազանգերն անպատասխան մնացին։
Արփի Հակոբյան
