07.10.2026 | 16:00
2-րդ դասարանի աշակերտուհուն ծեծելու դեպքով ուսուցչուհուն ձերբակալելու որոշում է կայացվել
«Մենք չենք ընդունում նման տոնայնությունը ՌԴ-ի և մեր նախագահի նկատմամբ»․ Պեսկովը՝ Պուտինին ՀԱՄԱՍ-ի հետ համեմատող Բայդենի հայտարարության մասին
Քաղաքականություն
20.10.2023 | 17:17
ՌԴ նախագահի մամուլի խոսնակ Դմիտրի Պեսկովը մեկնաբանել է ԱՄՆ նախագահ Ջո Բայդենի հայտարարությունը Վլադիմիր Պուտինի մասին, որում նա համեմատություններ է անցկացրել Պուտինի և ՀԱՄԱՍ-ի միջև։ Լրագրողների հետ ճեպազրույցում Պեսկովն ասել է, որ Կրեմլը «չի ընդունում նման տոնայնությունը» ՌԴ նախագահի նկատմամբ, գրում է Meduza-ն։
«Տարբեր քաղաքական գործիչների, այդ թվում՝ բարձրաստիճան քաղաքական գործիչների, պետական պաշտոնյաների ելույթներում շատ են էմոցիաները։ Բայց նման հռետորաբանությունը դժվար թե հարմար է պետությունների պատասխանատու ղեկավարներին։ Նման հռետորաբանությունը նաև ընդունելի չէ մեզ համար։ Մենք չենք ընդունում նման տոնայնությունը Ռուսաստանի Դաշնության, մեր նախագահի նկատմամբ»,- ասել է Պեսկովը։
Նա նշել է, թե Բայդենի խոսքերից հետևում է, որ ԱՄՆ-ը «կշարունակի փորձել ճնշում գործադրել և զսպել ՌԴ-ին»։ Ըստ Պեսկովի՝ այդ ջանքերն ապագայում էլ «կլինեն քիչ արդյունավետ»։
Հիշեցնենք, որ ԱՄՆ նախագահ Ջո Բայդենն իր ուղերձում ՀԱՄԱՍ-ին և Պուտինին նույն հարթության վրա էր դրել՝ ասելով, որ երկուսն էլ ցանկանում են ոչնչացնել հարևան ժողովրդավարական երկիրը, և դա հենց այն է, ինչ Միացյալ Նահանգները պարտավոր է կանխել, քանի որ այն մնում է ազատության ու ժողովրդավարության փարոս ամբողջ աշխարհի համար։
«ՀԱՄԱՍ-ը և Պուտինը տարբեր տեսակի սպառնալիքներ են, բայց նրանց ընդհանրությունն այն է, որ նրանք ցանկանում են ամբողջությամբ ոչնչացնել հարևան ժողովրդավարությունը»,- ասել էր ԱՄՆ նախագահը։
Էմմա Չոբանյան
