24.07.2026 | 14:25
Վիրավոր արագիլի ձագը տեղափոխվել է կենդանիների պաշտպանության հիմնադրամ
«Ռուսաստանն ու ՀԱՄԱՍ-ը նման են». Ուրսուլա ֆոն դեր Լեյեն
Քաղաքականություն
20.10.2023 | 17:03
Եվրահանձնաժողովի ղեկավար Ուրսուլա ֆոն դեր Լեյենը, ինչպես և ԱՄՆ նախագահ Ջո Բայդենը նույն հարթության վրա են դնում պաղեստինյան ՀԱՄԱՍ շարժումն ու Ռուսաստանի իշխանություններին, գրում է BBC-ի ռուսական ծառայությունը։
«Ռուսաստանն ու ՀԱՄԱՍ-ը նման են։ Ինչպես ասել է [Ուկրաինայի նախագահ Վլադիմիր] Զելենսկին՝ դրանց «էությունը նույնն է»։ Երկուսն էլ սպանել և պատանդ են վերցրել անմեղ քաղաքացիական անձանց, այդ թվում՝ նորածինների և երեխաների: Սա բարբարոսական պայքարի ձև է։ Եվ եթե այս վարակը չկանգնեցվի, այն կարող է տարածվել Եվրոպայից դեպի Մերձավոր Արևելք և Հնդկախաղաղօվկիանոսյան տարածաշրջան»,- ասել է նա՝ ելույթ ունենալով Ամերիկյան Հադսոն ինստիտուտում։
Հիշեցնենք, որ Բայդենը ժողովրդին ուղղված իր ուղերձում ասել էր, որ և՛ ՀԱՄԱՍ-ը, և՛ ՌԴ նախագահ Վլադիմիր Պուտինը ցանկանում են ոչնչացնել հարևան ժողովրդավարական երկիրը, և ԱՄՆ-ը պարտավոր է կանխել դա, քանի որ այն ազատության և ժողովրդավարության փարոս է ամբողջ աշխարհի համար։
«Մենք չենք կարող և թույլ չենք տա, որ հաղթեն ՀԱՄԱՍ-ի նման ահաբեկիչներն ու Պուտինի պես բռնակալները»,- ասել է նա։
ՀԱՄԱՍ-ը ճանաչված է որպես ահաբեկչական կազմակերպություն աշխարհի շատ երկրներում։ Ռուսաստանը, Ուկրաինա ներխուժելուց հետո, ճանաչվել է ահաբեկչության պետական հովանավոր մի շարք եվրոպական երկրների, ինչպես նաև Եվրախորհրդարանի և ՆԱՏՕ-ի Խորհրդարանական վեհաժողովի կողմից։
