Արցախցին 92-ամյա հոր հետ մնացել է ԼՂ-ում․ Կարմիր խաչը տեսանյութ է հրապարակել հայաթափված բնակավայրերից․ ՏԵՍԱՆՅՈՒԹ

Կարմիր խաչի միջազգային կոմիտեի աշխատակիցները Արցախում փնտրում են բնակիչների, որոնք տարբեր պատճառներով մնացել են իրենց տներում։ Կոմիտեն շուրջ ութ րոպեանոց տեսանյութ է հրապարակել, որում հանդիպում են սակավաթիվ չտեղահանվածներին, լսում նրանց կարիքները և հումանիտար օգնություն տրամադրում։ Կառույցը հայտնում է, որ քիչ թվով մարդիկ են մնացել իրենց տներում՝ կա՛մ կամավոր, կա՛մ այն պատճառով, որ չեն կարողացել ինքնուրույն հեռանալ:

Միջազգային կազմակերպության ներկայացուցիչը խոսում է հայաթափված Ստեփանակերտի երբեմնի մարդաշատ Վերածննդի հրապարակից։ Կադրում բնակիչներ չեն երևում։ Տեսախցիկը ֆիքսել է լքված քաղաքի ամայացած փողոցները, անտուն մնացած կենդանիներին, Ստեփանակերտում տիրող լռությունը։ Այս նկարահանումներն իրականացվել են մինչ Ադրբեջանի նախագահի Ստեփանակերտ կատարած այցը, քանի որ նախագահի նստավայրի մոտ դեռևսա չկան ադրբեջանական դրոշներ։

Թե քանի հայ է մնացել Արցախում՝ հստակ թվեր չկան․ Factor TV-ին հայտնեց Կարմիր խաչի միջազգային կոմիտեի մամուլի խոսնակ Զառա Ամատունին։

Արցախում մնացածներից մեկն էլ Ահարոն Ղազարյանն է։ Նա Կարմիր Խաչի աշխատակիցներին հայտնել է, որ հաղորդակցության բացակայության պատճառով տեղյակ չի եղել, որ Արցախը բռնի հայաթափվել է։

Ահարոն Ղազարյանը հայտնում է, որ չի կարողանում հարազատների հետ կապ հաստատել։ Տեղեկություններ չունի նրանց գտնվելու վերաբերյալ և չի պատկերացնում, թե առանց նրանց ինչպես է ապրելու հայաթափված Արցախում։ Նա Արցախում է մնացել 92-ամյա հոր հետ։

Թե կոնկրետ որ բնակավայրում են մնացել Ահարոն Ղազարյանն ու հայրը՝ չի պարզաբանվում։ ԿԽՄԿ-ի ներկայացուցիչը միայն ասում է, որ քիչ թվով բնակիչները հիմնականում հեռավոր գյուղերում են։

Հայաստան տեղափոխված արցախցիները ևս փորձում են ԿԽՄԿ-ի միջոցով տեղեկություններ ստանալ Արցախում մնացած իրենց հարազատների մասին։ Նրանցից մեկը Factor TV-ի հետ զրույցում նշեց, որ ԼՂ-ում մնացած ազգականները շաբաթվա մեջ մեկ-երկու անգամ զանգահարում են իրենց։

Մանրամասները՝ տեսանյութում։

Նարեկ Կիրակոսյան