Բարեփոխվում է «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքը

Առաջարկվող լրացմամբ ամրագրվում է, որ ՀՀ օդանավակայանների պաշտոնական պատվիրակությունների սրահից օգտվող օտարերկրյա պատվիրակությունների, ՀՀ պաշտոնատար անձանց սպասարկման կարգը, ինչպես նաեւ այդ սրահից օգտվող օտարերկրյա պատվիրակությունների եւ ՀՀ պաշտոնատար անձանց ցանկը սահմանվում է վարչապետի որոշմամբ: ՀՀ ԱԺ արտաքին հարաբերությունների մշտական հանձնաժողովը հոկտեմբերի 18-ին երկրորդ ընթերցմամբ քննարկել է Կառավարության հեղինակած ««Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում լրացումներ կատարելու մասին» օրենքի նախագիծը:

Նշված օդանավակայանների պաշտոնական պատվիրակությունների սրահից կկարողանան օգտվել նաեւ պաշտոնատար անձանց ընտանիքի անդամները:

ԱԳ փոխնախարար Պարույր Հովհաննիսյանը հայտնել է, որ առաջին ընթերցմամբ ընդունվելուց հետո ստացվել են առաջարկներ, որոնց մեծ մասն ընդունվել է:

Նա տեղեկացրել է նաեւ, որ նշված օրենքի համապատասխան հոդվածում սահմանված է, որ ՀՀ նախագահը, վարչապետը, ԱԺ նախագահը, հանրապետության պաշտոնաթող նախագահը, ինչպես նաեւ նրանց ուղեկցող ընտանիքի անդամները կարող են օգտվել ՀՀ օդանավակայանների առանձնացված հատուկ սրահից: «Հաշվի առնելով 2018 թվականի սահմանադրական փոփոխությունների արդյունքներով վարչապետի լիազորությունների լայն շրջանակը՝ առաջարկում ենք օրենքի 1-ին մասի դրույթը տարածել նաեւ 2018 թվականից հետո պաշտոնաթող վարչապետերի վրա»,- ասել է փոխնախարարը: Հանձնաժողովն ընդունել է այս բովանդակային առաջարկը: Ընդունված մնացած առաջարկները տեխնիկական բնույթի էին:

Հանձնաժողովը դրական եզրակացություն է տվել օրենքի նախագծին: