Քաղաքականություն
18.10.2023 | 23:02
Թուրքիայի «Լավ» (IYI) կուսակցության առաջնորդ Մերալ Աքշեներն իր կուսակցության խորհրդարանական խմբակցության հետ հանդիպման ժամանակ հանդես է եկել ելույթով՝ անդրադառնալով Գազայի հիվանդանոցի վրա վերջին հարձակմանը։ Իր ուղերձում Աքշեներն Իսրայելի վարչապետ Բենիամին Նեթանյահուն համեմատել է Ադոլֆ Հիտլերի միջև, փոխանցում է Gercek news-ը։
«Մարդասպան Նեթանյահուի մասին ասելու ոչինչ չի մնացել։ Նա 21-րդ դարի Հիտլերն է։ Նա խայտառակություն է այն ժողովրդի համար, որը Հոլոքոստ է ապրել: Ժամանակները տարբեր են, մտածելակերպը՝ նույնը։ Եվ նա պետք է անհապաղ դատվի»,- ասել է Աքշեները։
Նա նաև զուգահեռներ է անցկացրել հիվանդանոցի վերջին հարձակման և 1938 թվականին նացիստական Գերմանիայում տեղի ունեցած Բյուրեղյա գիշերվա միջև։
Աքշեները խոսել է նման դաժանություններին գլոբալ պատասխան տալու անհրաժեշտության մասին և կոչ արել յուրաքանչյուր ազգին, միջազգային կազմակերպությանը և անհատին, որոնք պնդում են, որ պաշտպանում են քաղաքակիրթ արժեքները, հաստատակամ դիրքորոշում ցուցաբերել բռնության այս գործողությունների դեմ: Աքշեներն ասել է, որ դա չանելը կհանգեցնի ծանր հետևանքների՝ պատմական զուգահեռ անցկացնելով Հիտլերի գործողությունների հանդարտեցման հետ, որոնք սարսափելի հետևանքներ ունեցան:
Հավելենք, որ նախօրեին հիվանդանոցի ռմբակոծությունը դատապարտել էր նաև Թուրքիայի նախագահ Ռեջեփ Թայիփ Էրդողանը, երկրի ԱԳՆ-ն, մի շարք այլ պաշտոնյաներ։ Բացի այդ, Թուրքիայի խորհրդարանի բոլոր կուսակցությունները համատեղ հայտարարությամբ դատապարտել էին միջադեպը և դրանում մեղադրել Իսրայելին։
Էմմա Չոբանյան
