07.10.2026 | 21:25
Հայաստանում երկաթգծերը վերականգնելու նախագծման մրցույթին ղազախական ու ուզբեկական ընկերություններ են մասնակցել, բայց չեն հաղթել
Ուկրաինան ստացել է ամերիկյան շուրջ 20 ATACMS հրթիռ
Քաղաքականություն
18.10.2023 | 16:49
New York Times-ը մանրամասներ է ներկայացրել Ուկրաինային ամերիկյան ATACMS հրթիռների փոխանցման մասին։ Լրատվամիջոցը, հղում անելով արևմտյան պաշտոնյաներին, գրում է, որ Ուկրաինան ստացել է շուրջ 20 նման հրթիռ։ Մինչ այժմ նշվում էր «մի քանի» հրթիռի մասին, փոխանցում է BBC-ի ռուսական ծառայությունը։
Նշվում է, որ մատակարարման մասին տեղեկությունը գաղտի է պահվել՝ նվազեցնելու ռուսական հարձակումների վտանգը, ինչպես նաև փորձել են անակնկալի բերել ռուս զինվորականներին։
Լրատվամիջոցի տվյալներով՝ ԱՄՆ-ն ուկրաինացի զինվորականներին է փոխանցել հրթիռի վաղ սերնդի տարբերակը՝ հագեցած կասետային մարտագլխիկով, որը պարունակում է 950 պաշարներ։
Նշվում է, որ ռուսական պատասխանը հրահրելու մտավախությունը միակ պատճառը չի եղել, որ նախագահ Ջո Բայդենի վարչակազմն այդքան երկար մերժում էր ATACMS-ի փոխանցման՝ ուկրաինական հարցումները։ Մասնավորապես, պաշտպանության նախարար Լլոյդ Օսթինը, որը դեմ է եղել մատակարարմանը, նշել է, որ ԱՄՆ-ն ունի նման հրթիռների սահմանափակ պաշար, և դրանք Կիևին մատակարարելը կարող է հանգեցնել պաշտպանունակության նվազման։ Բացի այդ, անհրաժեշտ էր հաշվի առնել բյուջետային խնդիրները՝ յուրաքանչյուր նման հրթիռ արժե մոտ 1,5 մլն դոլար։
Արդյունքում Օսթինը համաձայնել է միայն ATACMS-ի այն տարբերակի մատակարարմանը, որն ունի ընդամենը 160 կմ հեռահարություն և հագեցած է կասետային զինամթերքով, որը կարող է առավելագույն վնաս հասցնել անպաշտպան թիրախներին, ինչպիսիք են ինքնաթիռները։
Լրատվամիջոցը գրում է, որ որոշման ընդունման հարցում կարևոր գործոն է դարձել նաև ATACMS-ի «հստակ օգտագործման դեպքը»՝ ուկրաինական զինված ուժերի հարվածների համար ռուսական ավիաբազաներին։
Էմմա Չոբանյան
