Բայդենը վրդովմունք է հայտնել Գազայի հիվանդանոցի պայթյունի կապակցությամբ

ԱՄՆ նախագահ Ջո Բայդենը հայտարարություն է տարածել՝ խորը վրդովմունք հայտնելով Գազայի Ալ-Ահլի հիվանդանոցում տեղի ունեցած պայթյունի կապակցությամբ, սակայն դրա համար ոչ ոքի չի մեղադրել, գրում է BBC-ի ռուսական ծառայությունը։

«Ես վրդովված և խորապես վշտացած եմ Գազայի «Ալ Ահլի» հիվանդանոցում տեղի ունեցած պայթյունից, որը հանգեցրեց սարսափելի մարդկային զոհերի», – ասվում է Բայդենի՝ ԱՄՆ-ից Իսրայել թռչելիս տարածված հայտարարության մեջ:

Բայդենի խոսքով՝ պայթյունի մասին լուրերի հայտնվելուց անմիջապես հետո նա կապ է հաստատել Իսրայելի վարչապետ Բենիամին Նեթանյահուի և Հորդանանի թագավոր Աբուդուլլահ Երկրորդի հետ։

Բացի այդ, ըստ ԱՄՆ նախագահի, նա հանձնարարել է իր ազգային անվտանգության թիմին «շարունակել տեղեկություններ հավաքել իրականում տեղի ունեցածի մասին»։

«Միացյալ Նահանգները հավատարիմ է հակամարտությունների ժամանակ խաղաղ բնակիչների կյանքը պաշտպանելուն, և մենք սգում ենք այս ողբերգության հետևանքով զոհված կամ վիրավորված հիվանդների, բուժաշխատողների և այլ անմեղ զոհերի համար», – ասվում է հայտարարության մեջ:

ՀԱՄԱՍ-ը Իսրայելին է մեղադրում հիվանդանոցին հասցված հարվածների համար, իսրայելական զինվորականներն իրենց հերթին ասում են, որ հիվանդանոցը խոցվել է «Իսլամական ջիհադ» խմբավորման կողմից արձակված անսարք հրթիռով:

Հիվանդանոցի պայթյունից հետո Հորդանանը չեղյալ է հայտարարել Եգիպտոսի նախագահի, Պաղեստինի ինքնավարության ղեկավարի և Հորդանանի թագավորի և Բայդենի մասնակցությամբ  գագաթնաժողովը։