18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
Մենք հնարավորություն ունենք կաթվածահարելու Ադրբեջանի տնտեսությունը, առայժմ, սակայն, դրա առիթը չեմ տեսնում. Լևոն Մնացականյան. ՏԵՍԱՆՅՈՒԹ
Քաղաքականություն
24.07.2018 | 11:57
Արցախում այս պահին ընթացող Պաշտպանության բանակի հրամանատատար Լևոն Մնացականյանի ասուլիսին մասնակցում են նաև հայաստանյան ԶԼՄ-ների ներկայացուցիչները:
Անդրադառնալով Իսրայելից ձեռ բերված զենքերին՝ Արցախի պաշտպանության նախարարն ասաց, որ դրանք օպերատիվ մարտավարական հրթիռներ են՝ հեռահարությունը 300 կմ, նրա հավաստմամբ՝ նույնատիպ զենք ունենք նաև մենք և ունենք խոցելու հնարավորություն: «Մենք ունենք նաև հնարավորություններ ուղղորդելու այդ զենքերի աշխատանքը։ Մենք հնարավորություն ունենք կաթվածահարելու Ադրբեջանի տնտեսությունը: Առայժմ, սակայն, դրա առիթը չեմ տեսնում»,- պատասխանելով Մինգեչաուրի ջրամբարը ռմբակոծելու մասին հարցին՝ ասաց Լևոն Մնացականյանը:
Լրագրողները հետաքրքրվեցին նաև ապրիլյան քառօրյա պատերազմի ժամանակ կորսված Լելե թեփե բարձունքը հետ բերելու հնարավորության մասին, ինչին ի պատասխան, նախարարն ասաց․«Լելե թեփեին մեծ նշանակություն եք տալիս, նրա գագաթին մի մեքենա էլ չի կարող կանգնել: Քարոզչական է էդ կարևորությունը: Մենք էլ էդ բարձունքին հավասար բարձունքներ ունենք հենց Լելե թեփեի դեմը»։
Նախարարը խոսեց նաև այն մասին, թե Արցախի ներքաղաքական խնդիրներն ինչպե՞ս են անդրադառնում Պաշտպանության բանակի զգոնության վրա: «Բանակը մեր հասարակության մի մասն է, հնարավոր չէ, որ չազդի, բայց համաձայն ՀՀ Սահմանադրության 2-րդ հոդվածի, Զինված ուժերը ապաքաղաքական է և գտնվում է քաղաքացիական ուժերի հսկողության տակ: Մենք իրավունք չունենք անդամակցել հասարակական-քաղաքական կազմակերպություններին, ես նախազգուշացրել եմ իմ ենթականերին, որովհետև ահազանգեր ունենք, որ նման բաներ են հնարավոր»,- նշեց նախարարը՝ հավելելով, որ Արցախում կան քաղաքական ուժեր, որոնց անդամները մոտենում են այս կամ այն սպային, այս կամ այն պայմանագրային ծառայողին և համոզում, որ անդամակցեն իրենց:
«Սակայն նրանց կոպիտ պատասխան են տվել»,- նշեց ՊՆ նախարարը։
Ասուլիսի ընթացքում հարց հնչեց նաև սահմանին ադրբեջանական զինուժի կուտակումների մասին։ Նախարարի տեղեկացմամբ՝ հիմա այդ ուժերրը հիմնականում հետ են քաշված: «Մեր եզրակացությունն այն է, որ հնարավոր է ցանկացած սադրանք: Ցանկացած փոքր միջադեպ կարող է վերածվել լայնամասշտաբ գործողությունների: Մենք բոլոր զարգացումներին պատրաստ ենք»,- ընդգծեց նախարարը։
Մանրամասները’ տեսանյութում:
