18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
ՌԴ Պետդուման հաստատել է միջուկային փորձարկումների արգելման պայմանագրից հրաժարվելու օրինագիծը
Քաղաքականություն
17.10.2023 | 21:03
Ռուսաստանի Դաշնության Պետդուման հոկտեմբերի 17-ին միաձայն առաջին ընթերցմամբ ընդունել է Միջուկային համապարփակ համաձայնագրի (CTBT) վավերացումը չեղարկելու մասին օրինագիծը, գրում է DW-ի ռուսական ծառայությունը։
Դումայի խոսնակ Վյաչեսլավ Վոլոդինը, մեկնաբանելով միջազգային այս համաձայնագրի վավերացումը հետ կանչելու որոշումը, Telegram-ում նշել է, որ 23 տարի անց այս պայմանագիրը չի վավերացվել Միացյալ Նահանգների կողմից, և Վաշինգտոնին մեղադրել է «երկակի ստանդարտների» մեջ։ Վոլոդինի խոսքով՝ պայմանագրից դուրս գալու որոշումը կայացվում է Ռուսաստանի շահերից ելնելով և հանուն «գլոբալ ռազմավարական հավասարության» պահպանման։
Ավելի վաղ Վյաչեսլավ Վոլոդինը, մեկնաբանելով Միջուկային համապարփակ համաձայնագրից դուրս գալու գործընթացը, հիշատակել էր ՌԴ նախագահ Վլադիմիր Պուտինի հայտարարությունն այն մասին, որ Ռուսաստանը կատարել է միջմայրցամաքային թևավոր հրթիռի «վերջին հաջող փորձարկումը»։
«Աշխարհում իրավիճակը փոխվել է, Վաշինգտոնը և Բրյուսելը պատերազմ են սկսել մեր երկրի դեմ։ Այսօրվա մարտահրավերները նոր լուծումներ են պահանջում»,- ասել է Դումայի նախագահը։
Պուտինը հոկտեմբերի 5-ին առաջարկել է հրաժարվել համաձայնագրից՝ պատճառաբանելով Վաշինգտոնի կողմից դրա վավերացման բացակայությունը:
Միջուկային փորձարկումների համապարփակ արգելքի պայմանագիրն ընդունվել է ՄԱԿ-ի Գլխավոր վեհաժողովի կողմից 1996 թվականին։ Ռուսաստանը վավերացրել է փաստաթուղթը, ԱՄՆ-ն ու Չինաստանը՝ ոչ։
