Պուտինը կանոնների վրա հիմնված աշխարհակարգն «անհեթեթություն» է անվանել

Կանոնների վրա հիմնված աշխարհակարգն «անհեթեթություն» է, քանի որ ոչ ոք երբևէ չի տեսել կամ համաձայնեցրել այդ կանոնները, և նրանք, ովքեր խոսում են դրանց մասին, հավատարիմ են մնում «գաղութային մոտեցմանը։ Այս մասին հայտարարել է Ռուսաստանի նախագահ Վլադիմիր Պուտինը, գրում է The Moscow Times-ը:

«Դուք երբևէ տեսե՞լ եք այդ կանոնները: Ո՛չ, քանի որ ոչ ոք երբեք չի գրել դրանք և ոչ ոք երբևէ չի համաձայնեցրել դրանք որևէ մեկի հետ։ Ինչպե՞ս կարող ենք խոսել կարգի մասին՝ հիմնված կանոնների վրա, որոնք ոչ ոք չի տեսել: Առողջ բանականության տեսանկյունից սա նոնսենս է, սա ինչ-որ անհեթեթություն է»,- ասել է Պուտինը China Media Corporation-ին տված հարցազրույցում։

Նրա խոսքով՝ կանոնների վրա հիմնված աշխարհակարգի մասին խոսելն օգուտ է տալիս նրանց, ովքեր հանդես են գալիս նման գաղափարներով։

«Որովհետև, եթե ոչ ոք չի տեսել այդ կանոնները, նշանակում է՝ նրանք, ովքեր խոսում են այդ մասին, իրենք են դեպքից դեպք հորինում այդ կանոններն ու ներկայացնում իրենց շահերին համապատասխան: Սա գաղութատիրական մոտեցում է»,- ասել է Պուտինը։

ՌԴ նախագահը «գաղութային երկրներին» մեղադրել է նրանում, որ նրանք միշտ կարծում են, թե «առաջին կարգի մարդիկ են»։

«Ի վերջո, նրանք միշտ ասում էին, որ լուսավորություն են բերում իրենց գաղութներին, որ իրենք քաղաքակիրթ մարդիկ են և քաղաքակրթության օգուտները բերում են մյուս ժողովուրդներին, որոնք համարվում են երկրորդ կարգի մարդիկ»,- ասել է Պուտինը։