19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բայդենը հայտարարել է ՀԱՄԱՍ-ի ոչնչացման անհրաժեշտության մասին
Քաղաքականություն
16.10.2023 | 12:31
ԱՄՆ նախագահ Ջո Բայդենը կիրակի հայտարարել է, որ կարծում է՝ զինյալ ՀԱՄԱՍ խմբավորումը պետք է ոչնչացվի։ Նա միաժամանակ ընդգծել է պաղեստինյան ինքնավարություն ստեղծելու ծրագրի անհրաժեշտությունը։ Դրանից ավելի վաղ վարչակազմի պաշտոնյաները զգուշացրել էին, որ Իսրայելի և ՀԱՄԱՍ-ի միջև պատերազմը կարող է սրվել, գրում է VOA-ն։
Բայդենը չի կարծում, որ ռազմի դաշտում ԱՄՆ զինված ուժերի միջամտության կարիքը կլինի, քանի որ Իսրայելն ունի աշխարհի «լավագույն զինուժերից» մեկը։
Իսրայելն անխնա ռմբակոծում է Գազայի հատվածը՝ ի պատասխան ՀԱՄԱՍ-ի աննախադեպ հարձակումների, որոնց զոհ է դարձել մոտ 1300 իսրայելցի, հիմնականում՝ խաղաղ բնակիչներ:
Հարցին, թե արդյո՞ք կարծում է, որ ՀԱՄԱՍ-ը պետք է ամբողջությամբ ոչնչացվի, Բայդենը պատասխանել է. «Այո՛, ես այդպես եմ կարծում: Բայց պետք է լինի Պաղեստինի Ինքնավարություն: Պետք է ճանապարհ լինի դեպի պաղեստինյան պետություն»,- ասել է նա կիրակի օրը CBS-ին տված հարցազրույցի ժամանակ:
ԱՄՆ Նախագահը զգուշացրել է, որ Իսրայելի կողմից Գազայի զավթումը սխալ կլինի, սակայն Հեզբոլլահի և ՀԱՄԱՍԻ «ոչնչացումն անհրաժեշտություն» է:
Իսրայելը Հորդանան գետի Արևմտյան ափը, Գազայի հատվածը և Արևելյան Երուսաղեմը գրավել է 1967 թվականին։ Իսրայելին իր վերաբնակիչներին և զորքերը դուրս է բերել 2005 թվականին, նախքան 2007 թվականին ՀԱՄԱՍ-ի կողմից Գազա մտնելը:
Բայդենը նախազգուշացրել է Իրանին և «Հեզբոլլահին» զերծ մնալ հակամարտությանը միջամտելուց, ինչպես նաև երդվել է անել ամեն ինչ ամերիկացի պատանդներին գտնելու և ազատելու համար։ Կիրակի օրը Պետդեպարտամենտը հայտարարել էր, որ ՀԱՄԱՍ-ի ներխուժման հետևանքով զոհվել է ԱՄՆ 30 քաղաքացի, իսկ 13-ը՝ անհետ կորել և, հնարավոր է, նրանք պատանդ են վերցվել։
«Կա այս հակամարտության սրման վտանգ, հյուսիսում երկրորդ ճակատի բացման և, իհարկե, Իրանի ներգրավման վտանգը», – ավելի վաղ CBS-ին տված հարցազրույցում ասել էր Սպիտակ տան ազգային անվտանգության հարցերով խորհրդական Ջեյք Սալիվանը:
Գազայի իշխանությունները նշում են, որ այնտեղ սպանվել է ավելի քան 2670 մարդ, որոնց մեկ քառորդը երեխաներ են։ Սպասվում է, որ զոհերի թիվը կավելանա, քանի որ Իսրայելը ցամաքային հարձակման է պատրաստվում փոքրիկ, խիտ բնակեցված անկլավի ուղղությամբ, որը կարող է սկսվել մի քանի օրվա ընթացքում:
