14.12.2025 | 17:25
Իրավիճակը ճանապարհներին՝ 17։15-ի դրությամբ
Կուսակցությունս կուսակցությանդ վնաս չէ․ ՀՎԿ-ի նախկին խոսնակ Էդգար Առաքելյանը նոր կուսակցություն է ստեղծում
Քաղաքականություն
23.07.2018 | 20:35
Արտահերթ խորհրդարանական ընտրություններին ընդառաջ քաղաքագետ, ՀՎԿ-ի նախկին խոսնակ Էդգար Առաքելյանը հիմնում է նոր կուսակցություն, որի նպատակն է զարկ տալ ներկուսակցական ժողովրդավարությանը և սեփական օրինակով փոխել Հայաստանում ընթացող կուսակցական գործընթացները։
Այս մասին Factor.am-ի հետ զրույցում ասաց Առաքելյանը՝ ընդգծելով, սակայն, որ դեռ պարզ չէ, թե ինչպես է կոչվելու նորաստեղծ կուսակցությունը։
«Կուսակցության անունն առաջիկայում, երբ տեղի կունենա մեր առաջին համագումարը, կհայտարարենք։ Միայն նշեմ, որ կուսակցության կազմում ընդգրկված են երիտասարդներ՝ 30-35 տարեկան, որոնց մեջ մեծ թիվ են կազմում տարբեր ոլորտների մասնագետներ»։
Հարցին՝ արդյոք կուսակցության ստեղծումն այս փուլում նպատակ է հետապնդում մասնակցել Երևանի ավագանու սպասվող ընտրություններին՝ Էդգար Առաքելյանը պատասխանեց․ «Երևան քաղաքի ավագանու ընտրություններին, թերևս, տեխնիկական պատճառներով չենք կարողանա մասնակցել։ Իսկ ահա սպասվող խորհրդարանական ընտրություններին պատրաստվում ենք մասնակցել»։
Էդգար Առաքելյանը դժվարացավ պատասխանել հարցին, թե խորհրդարանում հայտնվելուց հետո իրենք կհամալրեն ընդդիմության, թե իշխանության շարքերը՝ նշելով, որ դա պարզ կդառնա այն ժամանակ, երբ կուսակցության համագումարում կհայտարարեն իրենց քաղաքական հայացքների մասին։
Նորաստեղծ կուսակցության նախաձեռնողից հետաքրքրվեցինք նաև՝ ինչպես են պատրաստվում լուծել խորհրդարանական ընտրության պատրաստվող կուսակցությանն անհրաժեշտ ֆինանսսական միջոցների հարցը․
«Ֆինանսավորման հարցը մեզ համար ամենաբարդ հարցն է, կփորձենք հանրային աջակցությանը դիմել, գուցե, նաև լինեն անհատ քաղաքացիներ, ովքեր կցանկանան ֆինանսական աջակցություն ցուցաբերել։ Սակայն պետք է փաստեմ, որ որևէ օլիգարխ կամ գործարար մեր այս կուսակցության, մեր այս նախաձեռնության հետևում կանգնած չէ»,- վստահեցրեց նա։
Հիշեցնենք, որ Էդգար Առաքելյանը նախկինում ՀՎԿ-ի խոսնակն էր ու կուսակցության արտաքին քաղաքական կապերի պատասխանատուն։
Աղավնի Սուքիասյան
