Ինչ են քննարկել Պուտինն ու Ալիևը Բիշքեկում

Բիշքեկում նախօրեին տեղի ունեցած հանդիպմանը ՌԴ նախագահ Վլադիմիր Պուտինն ու Ադրբեջանի նախագահ Իլհամ Ալիևը գոհունակություն են հայտնել երկու երկրների միջև առևտրատնտեսական կապերի զարգացումից, մասնավորապես՝ ապրանքաշրջանառության աճից։ Բարձրացվել է միջտարածաշրջանային համագործակցության հարցը, նշվել է, որ Ադրբեջանը «հաջողությամբ համագործակցում է Ռուսաստանի Դաշնության 70 շրջանների հետ»։ Այս համատեքստում ընդգծվել է, որ պարբերաբար անցկացվող միջտարածաշրջանային ֆորումները կարևոր հարթակ են, հաղորդում են ադրբեջանական լրատվամիջոցները։

Զրույցի ընթացքում նաև գոհունակություն է արտահայտվել Հյուսիս-Հարավ տրանսպորտային միջանցքի զարգացման, դրա ներուժի աճի և, առհասարակ, այս երթուղու բեռնափոխադրումների ծավալների աճի առնչությամբ՝ ինչպես երկաթուղային, այնպես էլ ավտոմոբիլային տրանսպորտով։ Ընդգծվել է հումանիտար ոլորտում համագործակցության հաջող զարգացումը, այս թվում՝ «Ադրբեջանում հոգածությունը ռուսաց լեզվի նկատմամբ»։

Նշվել է նաև Ադրբեջանի և Ռուսաստանի միջև միջկառավարական պետական ​​հանձնաժողովի գործունեության կարևորությունը։

Հավելենք, որ երկու երկրների նախագահները Ղրղզստանում են՝ մասնակցելու այսօր կայանալիք ԱՊՀ անդամ պետությունների ղեկավարների գագաթնաժողովին, որին Հայաստանը չի մասնակցում։

Իսկ Ալիևի հետ բանակցությունների մեկնարկին Պուտինն ասել էր, որ քննարկման «թիվ մեկ հարցը Ղարաբաղի շուրջ իրավիճակն է»։

Էմմա Չոբանյան