Քաղաքականություն
12.10.2023 | 22:46
Ստրասբուրգում Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի շրջանակում «Գուբադ Իբադօղլուի ձերբակալությունը և քաղբանտարկյալների վիճակը Ադրբեջանում» թեմայով լսումներ են անցկացվել, գրում են ադրբեջանական լրատվամիջոցները։
Քննարկումը կազմակերպել են Ադրբեջանի Լրագրողների ազատության և անվտանգության ինստիտուտը (IRFS)՝ ԵԽԽՎ մի շարք պատգամավորների հետ համագործակցությամբ:
Քննարկումների ժամանակ ընդդիմադիր քաղաքական գործիչ Գուբադ Իբադօղլուի որդին՝ Իբադ Բայրամովը խոսել է հոր դեմ կեղծ մեղադրանքների, կեղծ ցուցմունքների արդյունքում բերված վկաների ցուցմունքների մասին։ Նա նշել է նաև, որ քննչական մեկուսարանում Իբադօղլուի առողջության վատթարացման և արդյունավետ բուժօգնության բացակայության մասին։
«Ադրբեջանում կեղծ մեղադրանքներով ձերբակալել են ոչ միայն Գուբադ Իբադօղլուին, այլև ավելի քան 200 այլ քաղբանտարկյալների։ Այս վիճակագրությունը գնալով աճում է, սակայն երկրում չկան անկախ կազմակերպություններ, որոնք կարող են հետևել քաղբանտարկյալների հետ կապված իրավիճակին։ Այդ հաստատություններին կա՛մ ստիպել են հեռանալ երկրից, կա՛մ արգելվել է նրանց գործունեությունը»,- ասել է Բայրամովը։
Եվրոպական կայունության նախաձեռնության տնօրեն Ջերալդ Կնաուսը նշել է, որ չնայած ԵԽԽՎ պատգամավոր Քրիստոֆ Շտրասերի կողմից Ադրբեջանում քաղբանտարկյալների վերաբերյալ զեկույցի պատրաստումից 10 տարի է անցել, այդ խնդիրը երկրում դեռ պահպանվում է, և քաղաքական դրդապատճառներով ձերբակալությունները շարունակվում են։
«Մենք դեռ տեսնում ենք, թե ինչպես են Եվրոպայի խորհրդի անդամ պետությունում մարդիկ ձերբակալվում քաղաքական դրդապատճառներով, շինծու մեղադրանքներով և ճնշվում քննադատական ձայները: Ադրբեջանում ԶԼՄ-ների մասին նոր օրենքն ավելի է բարդացրել այս թեմայի շուրջ քննարկումները: Իսկ կուսակցությունների մասին նոր օրենքն անհնարին է դարձնում նրանց ազատ գործունեությունը»,- ասել է Կնաուսը։
ԵԽԽՎ մի շարք պատգամավորներ առաջարկել են ավելի արդյունավետ քայլեր ձեռնարկել քաղբանտարկյալների խնդիրը լուծելու և, ընդհանրապես, Ադրբեջանում մարդու իրավունքների վիճակը բարելավելու համար։
Նաև նշվել է, որ կարիք կա Ադրբեջանում քաղբանտարկյալների հարցով ԵԽԽՎ զեկուցող վերանշանակել։
Էմմա Չոբանյան
