Թեհրանն ու Էր-Ռիադն իսլամական աշխարհին միասնականության կոչ են արել

Իրանի նախագահ Էբրահիմ Ռաիսին և Սաուդյան Արաբիայի թագաժառանգ արքայազն Մուհամեդ բեն Սալմանը պահանջել են վերջ տալ պաղեստինցիների դեմ «պատերազմական հանցագործություններին» և ընդգծել իսլամական աշխարհում միասնության կարևորությունը։ Այս մասին հայտնել է Ռաիսիի աշխատակազմի քաղաքական հարցերով տեղակալ Մոհամմադ Ջամշիդին, գրում է Tasnim news-ը։

Առաջնորդները հեռախոսով զրուցել են 45 րոպե։ Արդյունքում Ռաիսին և Մուհամեդ բեն Սալմանը համաձայնել են Պաղեստինի դեմ ռազմական հանցագործությունների դադարեցման անհրաժեշտության շուրջ։ Նրանք նաև «ընդգծել են իսլամական միասնականության կարևորությունը և համոզմունք հայտնել, որ իսրայելական վարչակարգի հանցագործությունները, եթե ԱՄՆ-ը ներողամիտ լինի», կարող են կործանարար հետևանքներ ունենալ»։

Սաուդյան Արաբիայի թագաժառանգը ստեղծված իրավիճակը տագնապալի և վտանգավոր է անվանել ու ընդգծել, որ պաղեստինցիների իրավունքների խախտումը կարող է հանգեցնել տարածաշրջանում էսկալացիայի և ապակայունացման։

Ռաիսին հեռախոսազրույց է ունեցել նաև Սիրիայի նախագահ Բաշար ալ-Ասադի հետ։ Իրանի նախագահը հայտարարել է, որ «այսօր բոլոր իսլամական, արաբական երկրները և աշխարհի բոլոր ազատասեր մարդիկ պետք է հասնեն լուրջ կոնսենսուսի և ամրապնդեն համագործակցությունը՝ դադարեցնելու Իսրայելի հանցագործությունները պաղեստինցիների դեմ, և որ Իրանը փորձում է հասնել նման կոորդինացման որքան հնարավոր է՝ շուտ», հայտնել է իրանցի պաշտոնյան։

ՀԱՄԱՍ-ի Առողջապահության նախարարության վերջին տվյալներով՝ Գազայի հատվածում զոհվել է 1,354 մարդ, վիրավորվել՝ 6,049-ը։ Իսրայելի Պաշտպանության բանակը հայտնել է, որ Իսրայելի վրա հարձակման հետևանքով զոհերի թիվը գերազանցել է 1,300-ը, այդ թվում՝ 222 զինվորական: Եվս 200 մարդ, ըստ զինվորականների, պատանդառվել են կամ անհետ կորել։