ԵԽԽՎ-ն Ադրբեջանին ու մի շարք երկրների կոչ է անում հետաքննել լրտեսական Pegasus ծրագրի օգտագործումը

Կան ապացույցներ, որ լրտեսական ծրագրերը ոչ լեգիտիմ նպատակներով օգտագործվել են Եվրոպայի խորհրդի անդամ մի քանի երկրների կողմից։ Մասնավորապես, Եվրոպայի խորհրդի խորհրդարանական վեհաժողովը (ԵԽԽՎ) հինգ երկրների կառավարությունների հորդորել է երեք ամսվա ընթացքում տեղեկություններ տրամադրել նման լրտեսական ծրագրերի օգտագործման վերաբերյալ և ամբողջությամբ հետաքննել չարաշահումների բոլոր դեպքերը:

Հաստատելով Pegasus-ի և նմանատիպ լրտեսական ծրագրերի ու գաղտնի պետական հսկողության մասին բանաձևը՝ ԵԽԽՎ-ն Լեհաստանին, Հունգարիային, Հունաստանին, Իսպանիային և Ադրբեջանին հորդորել է անհապաղ և ամբողջությամբ հետաքննել լրտեսող ծրագրերի չարաշահման բոլոր դեպքերը, ցանկացած հայտնաբերման դեպքում պատիժ սահմանել և փոխհատուցում տրամադրել զոհերին:

Բանաձևը, որը հիմնված է Պիտեր Օմցիգտի զեկույցի վրա, նաև կոչ է անում մյուս անդամ երկրներին, որոնք, ենթադրաբար, ձեռք են բերել կամ օգտագործել Pegasus-ը, այդ թվում՝ Գերմանիային, Բելգիային, Լյուքսեմբուրգին և Նիդերլանդներին, պարզաբանել դրա օգտագործումը և ներկայացնել այն վերահսկելու մեխանիզմները երեք ամսվա ընթացքում:

Խորհրդարանականները նաև տեղեկություն են խնդրել Իսրայելից (ծրագիրը վաճառվում է իսրայելական ընկերության կողմից), թե ինչ է անում, որպեսզի ծրագիրը չարտահանվի երկրներ, որտեղ այն կարող է օգտագործվել մարդու իրավունքները խախտելու նպատակով։ Տեղեկություններ են պահանջվում նաև Մարոկկոյից, որը, ենթադրաբար, օգտագործել է Pegasus-ն Իսպանիայում։

Էմմա Չոբանյան