30.05.2026 | 16:23
Երևանի 3 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Ալիևի ներկայացուցիչը հայտարարել է, թե «Ադրբեջանը մտադիր չէ Հայաստանի դեմ պատերազմ սկսել»
Քաղաքականություն
12.10.2023 | 11:23
Ֆրանսիական Radiofrance ռադիոկայանին տված հարցազրույցում Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը հայտարարել է, թե Ադրբեջանը մտադիր չէ Հայաստանի դեմ պատերազմ սկսել ու ցանկանում է վերսկսել բանակցությունները Հայաստանի հետ խաղաղության հասնելու համար։
«Իհարկե, եթե Հայաստանը հարձակվի մեզ վրա, մենք ձեռքերը ծալած չենք նստի, բայց ես չեմ կարծում, որ դա բխում է Հայաստանի շահերից, մենք պետք է վերադառնանք բանակցությունների ուղի և օգտվենք Եվրամիության ձգտումից առաջ տանելու խաղաղության գործընթացը։ Պետք է խոսել սահմանների սահմանազատման, հաղոդակցման գծերի մասին։ Շառլ Միշելը լավ աշխատանք է կատարել որպես Եվրոպական խորհրդի նախագահ՝ օգնելով վերսկսել բանակցությունները: Ադրբեջանը պատրաստ է Եվրամիության հետ եռակողմ ձևաչափով բանակցությունների»,-նշել է Ամիրբեկովը։
Հիշեցնենք, որ Ադրբեջանը հրաժարվել էր Գրանադայում ԵՄ-ի նախարաձեռնած հանդիպմանը մասնակցելուց։ Նախօրեին էլ Ադրբեջանի նախագահը հայտարարել էր, թե Բաքվի համար նախընտրելի է ռուսական միջնորդությունը։
Ամիրբեկովի խոսքով՝ Ադրբեջանը խաղաղության պայմանագրում ևս մեկ անգամ կհաստատի իր «անվերապահ հավատարմությունը երկրների տարածքային ամբողջականության սկզբունքին».
«Մենք վերջ կտանք այս թշնամությանը, որը շարունակվում է շուրջ երեսուն տարի, Հայաստանի հայտարարությունները, թե Ադրբեջանը պատրաստվում է նոր պատերազմի, լիովին անհիմն են։ Մենք հարգում ենք Հայաստանի տարածքային ամբողջականությունը, ինչպես աշխարհի բոլոր երկրներինը»,-ասել է Ալիևի ներկայացուցիչը։
Ի դեպ, Ադրբեջանի նախագահի հայտարարություններն այս ֆոնին տարբերվում են, քանի որ Ալիևը հաճախակի է անհիմն տարածքային պահանջներ ներկայացնում։
Էմմա Չոբանյան
