10.01.2025 | 23:14
ՊԵԿ նախագահն ընդունել է Հնդկաստանի դեսպանին
Պուտինը հայտարարել է, թե Ադրբեջանը հետաքրքրված է Թուրքիայում գազային հանգույցի ստեղծմամբ
Քաղաքականություն
11.10.2023 | 23:18
Թուրքիայում գազային հանգույցի նախագիծն առաջին փուլում նախատեսում է դեպի Եվրոպա գազի առևտրի էլեկտրոնային հարթակի ստեղծում։ Եվրոպայում բոլորը, որոնք ցանկանում են ձեռք բերել ռուսական ռեսուրսներ, շահագրգռված են այս նախագծով։ Այս մասին հայտարարել է ՌԴ նախագահ Վլադիմիր Պուտինը ռուսական էներգետիկ շաբաթվա լիագումար նիստում, փոխանցում է ՏԱՍՍ-ը։
«Խոսքն առաջին հերթին եվրոպական մայրցամաքում գազի առևտրի էլեկտրոնային հարթակի ստեղծման մասին է, դա հետաքրքրում է բոլորին՝ մեր թուրք ընկերներին, մեզ և բոլորին, որոնք ցանկանում են գնել մեր ռեսուրսները եվրոպական մայրցամաքում։ Այդպիսիք կան, բայց այսօր մենք այնտեղ գազ ենք մատակարարում Թուրքիայի տարածքով։ Մենք ունենք երկու երթուղի՝ «Թուրքական հոսք» և «Կապույտ հոսք», դրանք գործում են արդյունավետ և ամբողջությամբ լցված են: Սկզբունքորեն մենք գաղափարներ ունենք այդ հնարավորություններն ընդլայնելու համար»,- ասել է ՌԴ նախագահը։
Պուտինը նշել է, որ Ռուսաստանը մեծ խնդիրներ չի տեսնում հարթակի ստեղծման հարցում, քանի որ և՛ Թուրքիան, և՛ ՌԴ-ն հետաքրքրված են այս նախագծով։ Բացի այդ, Ադրբեջանը նույնպես հետաքրքրություն է ցուցաբերում գազային հանգույցի նկատմամբ։
«Թուրքիան հետաքրքրված է, մենք նաև խոսել ենք Ադրբեջանի հետ։ Նա նույնպես հետաքրքրություն է ցուցաբերում»,- ասել է Վլադիմիր Պուտինը։
Հավելենք, որ Թուրքիայի էներգետիկայի և բնական պաշարների նախարար Ֆաթիհ Դյոնմեզը նախորդ տարեվերջին հայտարարել էր, որ Ադրբեջանի նախագահ Իլհամ Ալիևն իր աջակցությունն է հայտնել գազային հանգույցի նախագծին։
Նշենք, որ Թուրքիայի և ՌԴ-ի նախագահներ Ռեջեփ Թայիփ Էրդողանն ու Վլադիմիր Պուտինն ավելի վաղ հանձնարարել էին շտապ մշակել Թուրքիայում գազային հանգույցի ստեղծման նախագիծ, որով Ռուսաստանը կարող է գազի տարանցումը Հյուսիսային հոսքերից տեղափոխել դեպի Սևծովյան տարածաշրջան և Թուրքիա։ Էրդողանը նաև ասել էր, որ Եվրոպան կարող է ռուսական գազ ստանալ Թուրքիայի տարածքով։
Էմմա Չոբանյան
