«Իսրայելը պետք է հիշի` եթե գործելու է որպես կազմակերպություն, ոչ թե պետություն, ի վերջո նրան կվերաբերվեն որպես կազմակերպության»․ Էրդողան

Թուրքիայի նախագահ Ռեջեփ Թայիփ Էրդողանը ելույթ է ունեցել Ազգային Մեծ ժողովում՝ իր գլխավորած «Արդարություն և զարգացում» կուսակցության խորհրդականական խմբակցության նիստում։ Նա անդրադարձել է նաև Իսրայելի վրա ՀԱՄԱՍ-ի հարձակմանն ու դրան հետևած իրադաձություններին, գրում են թուրքական լրատվամիջոցները։

«Մեր դիրքորոշումը թե՛ ահաբեկչության դեմ պայքարի, թե՛ մեր տարածաշրջանում բոլոր պատերազմների ու հակամարտությունների վերաբերյալ շատ հստակ է։ Մենք արդարացված չենք համարում խաղաղ բնակչության դեմ ուղղված որևէ գործողություն կամ քաղաքացիական բնակավայրերի դեմ ուղղված որևէ հարձակում։ Մենք կարծում ենք, որ պատերազմը բարոյականություն ունի, և կողմերը պետք է պահպանեն այն»,- ասել է Էրդողանը։

«Ամոթալի մեթոդներով իրականացվող հակամարտությունը պատերազմ չէ, այլ ջարդ։ Ցավոք, Իսրայելի և Գազայի հակամարտությունների ժամանակ այս սկզբունքը խիստ խախտվում է։ Մենք բացահայտորեն դեմ ենք Իսրայելի տարածքում խաղաղ բնակիչների սպանությանը»,- հավելել է Թուրքիայի նախագահը։

Նա նշել է, որ «քաղաքացիական բնակավայրերը ռմբակոծելը, խաղաղ բնակիչների դիտավորյալ սպանությունը, տարածաշրջան մարդասիրական օգնություն հասցնող մեքենաների արգելափակումը կարող է լինել միայն «կազմակերպության, ոչ թե պետության ռեֆլեքս»։

«Իսրայելը չպետք է մոռանա, որ եթե նա հանդես գա ոչ թե պետության, այլ կազմակերպության պես, ի վերջո, կսկսեն իրեն վերաբերվել որպես կազմակերպության: Ո՛չ տարածաշրջանը, ո՛չ աշխարհը չեն կարող հանդուրժել տարածաշրջանում հակամարտությունների ու մարդկային ողբերգությունների շարունակությունը։ Պատճառներից մեկը, թե ինչու Պաղեստինի հարցը դատապարտված է չլուծված մնալու, միջազգային հանրությունն է, որը չի կատարում իր խոստումներից ոչ մեկը։ ՄԱԿ-ը և այլ կազմակերպություններ միայնակ են թողել պաղեստինցի ժողովրդին, չեն հարգել իրենց խոստումները և չեն կարողացել պաշտպանել պաղեստինցիների իրավունքներն ու օրենքները»,- ասել է Թուրքիայի նախագահը։

Նա նաև հայտնել է, որ Անկարան պատրաստ է գործադրել բոլոր ջանքերը, լինել միջնորդ և «արդար արբիտրաժ», որպեսզի տարածաշրջանն արագ դուրս բերվի ստեղծված իրավիճակից։

Էմմա Չոբանյան