Մանվել Գրիգորյանի խափանման միջոցը կփոխվի՞․ փաստաբանը մտահոգված է

ԱԺ նախկին պատգամավոր, գեներալ Մանվել Գրիգորյանի առողջական վիճակը գնալով վատանում է: Այս մասին Factor.am-ին ասաց Գրիգորյանի պաշտպաններից Արսեն Մկրտչյանը։ «Իմ պաշտպանյալի շաքարախտի ցուցանիշները գնալով բարձրանում են, ինչ վերաբերվում է անբուժելի հիվանդությանը, որի համար պետք են պրոֆիլակտիկ պրոցեդուրաներ, դրանք արդեն ուշացել են և չեն կատարվել, հետևաբար նման պայմաններում նրա առողջական վիճակն օր օրի վատանում է»,- ասաց պաշտպանը:

Միևնույն ժամանակ, նա նշեց, որ Մանվել Գրիգորյանի նկատմամբ կա հատուկ ուշադրություն․ «Մարդկային վերաբերմունք կա և՛ կալանավայրի ադմինիստրացիայի կողմից, և՛ օմբուդսմենի գրասենյակից։ Բացի մեր փաստաբանների միջնորդություններից, ամենայն հավանականությամբ, կլինի նաև օմբուդսմենի միջամտությունը և, կարծում եմ, դա կլինի արդարադատության և առողջապահության նախարարների միջոցով, և չի բացառվում, որ բժիշկներն էլ, տեսնելով այս անմխիթար վիճակը, իրենք էլ ձայն բարձրացնեն»,- ասաց փաստաբանը։

Պաշտպանը հույս հայտնեց, որ Գրիգորյանի խափանման միջոցը, հաշվի առնելով նրա առողջական վիճակը, կփոխվի․ «Նման պայմաններում, հաշվի առնելով նրա առողջական վիճակը, այդ հանիրավի, շինծու մեղադրանքի պայմաններում, չգիտես ում, չգիտես ինչ ապացուցելու համար չարժի, որ Արցախի հերոսին պահեն կալանքի տակ»։

Ի դեպ, պաշտպանական կողմն այսօր արդեն Մանվել Գրիգորյանի խափանման միջոցը փոխելու հարցով կդիմի Վճռաբեկ դատարան: «Պատրաստվում ենք դիմել Վճռաբեկ դատարան, համապատասխան փաստաթղթերն արդեն պատրաստ են, բողոքը մինչև օրվա վերջ արդեն ներկայացված կլինի»,- տեղեկացրեց փաստաբանը։

Հիշեցնենք, որ Մանվել Գրիգորյանը հունիսի 19-ին կալանավորվել է: Նա մեղադրվում է ապօրինի զենք-զինամթերք պահելու և առանձնապես խոշոր չափի յուրացում կատարելու մեջ: Գրիգորյանի առանձնատնից ԱԱԾ-ն, հիշեցնենք, մեծ թվով զենքեր, թանկարժեք մեքենաներ, զինվորի բաժին մակնշված ուտելիքներ և ապրիլյան պատերազմի օրերին զինվորներին ուղարկված մթերքներ, հագուստ և նամակներ էր հայտնաբերել։

Լիլիթ Շաբոյան