ԲԴԽ անդամը ցանկանում է Վճռաբեկ դատարան տեղափոխվել այն դատավորների փոխարեն, որոնց լիազորությունները դադարեցնելու որոշումը ստորագրել է 

Բարձրագույն դատական խորհուրդը սեպտեմբերի 29-ին դռնփակ նիստում քննարկել է Վճռաբեկ դատարանում դատավոր նշանակվելու համար առաջխաղացման ենթակա դատավորների թեկնածուների ցուցակները կազմելու, հաստատելու և Ազգային ժողովին առաջարկություններ ներկայացնելու վերաբերյալ հարցը և որոշել Դավիթ Խաչատուրյանին, Անահիտ Հակոբյանին և Մանվել Շահվերդյանին առաջարկել որպես Վճռաբեկ դատարանի քրեական պալատի դատավորի թեկնածուներ, իսկ Գուրգեն Մալխասյանին, Կարեն Թումանյանին և Նաիրա Հովսեփյանին՝ որպես նույն դատարանի քաղաքացիական պալատի դատավորներ։ Այս մասին տեղեկանում ենք Բարձրագույն դատական խորհրդի կայքից։

Վճռաբեկ դատարանի քրեական պալատում դատավորի 1 թափուր հաստիք է առաջացել, քանի որ դատավոր Ելիզավետա Դանիելյանը դարձել է Վճռաբեկ դատարանի Հակակոռուպիոն պալատի դատավոր։ Այս պալատի դատավորի թեկնածու Դավիթ Խաչատուրյանը Բարձրագույն դատական խորհրդի գիտնական անդամ է։ Նրան 2021 թվականին Ազգային ժողովն է ընտրել որպես ԲԴԽ անդամ։

Քրեական պալատի դատավորի հաջորդ թեկնածուն՝ Անահիտ Հակոբյանը, փաստաբան է, իսկ Մանվել Շահվերդյանը Երևանի ընդհանուր իրավասության քրեական դատարանի դատավոր է։ 

Շահվերդյանը քննել է վարչապետ Նիկոլ Փաշինյանի որդուն առևանգելու դեպքի առթիվ քրեական գործը և դռնփակ նիստով որոշել մեղքն ընդունած Ազգուշ Մարտիրոսյանին (հայտնի է Գայանե Հակոբյան) պայմանական ազատազրկման դատապարտել։ Շահվերդյանին են մակագրված եղել նաև քաղաքական հնչերանգ ունեցող, պաշտպանության նախկին նախարար Դավիթ Տոնոյանի, ԲԴԽ նախկին նախագահ Ռուբեն Վարդազարյանի վերաբերյալ քրեական գործերը, սակայն Հակակոռուպցիոն դատարանի ձևավորումից հետո այս գործերը փոխանցվել են այս դատարանին։

Վճռաբեկ դատարանի քաղաքացիական պալատի դատավորի թեկնածու Կարեն Թումանյանը փաստաբան է, գործունեություն է իրականացնում Լոռու մարզում։  Գուրգեն Մալխասյանը նույնպես եղել է փաստաբան։ Նա սեպտեմբերի 11-ին, այսինքն՝ մեկ ամսից էլ քիչ ժամանակ առաջ, նշանակվել է Շիրակի մարզի ընդհանուր իրավասության դատարանի դատավոր։ Նաիրա Հովսեփյանը Երևանի քաղաքացիական դատարանի դատավոր է, ԲԴԽ անդամ։

Վճռաբեկ դատարանի քաղաքացիական պալատում դատավորի թափուր հաստիք է առաջացել այն բանից հետո, երբ Բարձրագույն դատական խորհուրդը ՄԻԵԴ վճռի հիմքով դադարեցրել է պալատի դատավորներ Արտակ Բարսեղյանի և Տիգրան Պետրոսյանի լիազորությունները։ Հատկանշական է, որ դատավոր Նաիրա Հովսեփյանը որպես ԲԴԽ անդամ ստորագրել է դատավորներ Պետրոսյանի և Բարսեղյանի լիազորությունները դադարեցնելու որոշումները։

Նաիրա Հովսեփյանը Վճռաբեկ դատարանի դատավոր դառնալու հավակնություն ուներ դեռևս 2022 թվականից։ 2022-ի հունիսին նա առաջադվել էր որպես Վճռաբեկ դատարանի դատավորի թեկնածու, սակայն Ազգային ժողովը նրան մեկ ձայն անգամ չէր տվել։

Դրանից մեկ ամիս անց՝ հուլիսի 27-ին դատավորները նրան ընտրել էին ԲԴԽ անդամ։

Որպես ԲԴԽ անդամ՝ Նաիրա Հովսեփյանը ստորագրել է նաև դատավոր Աննա Փիլոսյանի լիազորությունները դադարեցնելու որոշման տակ։ Այս դատավորի նկատմամբ կարգապահական վարույթ էր հարուցվել 4 դատական ակտ ուշ տրամադրելու համար։ Այն բանից հետո, երբ Նաիրա Հովսեփյանը ստորագրել էր Փիլոսյանի լիազորությունները դադարեցնելու որոշումը, այլ փաստաբաններ հրապարակել էին Հովսեփյանի կողմից ուշացված դատական ակտերի վերաբերյալ տեղեկություններ, սակայն Հովսեփյանի վերաբերյալ Արդարադատության նախարարությունը վարույթ չի հարուցել։

Արաքս Մամուլյան