15.01.2026 | 09:57
Մարվել է ՆԳՆ ոստիկանության Երևան քաղաքի վարչության շենքում բռնկված հրդեհը. տուժածներ չկան
ՀՀ տարածքային ամբողջականության հարցում միջազգային կոնսոլիդացիա կա՞․ Գրանադայի հանդիպման արդյունքները. ՏԵՍԱՆՅՈՒԹ
Քաղաքականություն
06.10.2023 | 20:32
Վարչապետ Նիկոլ Փաշինյանն Իսպանիայի Գրանադա քաղաքում Եվրոպական խորհրդի նախագահ Շառլ Միշելի, Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ բանակցություններից հետո հերթական անգամ վերահաստատեց՝ ճանաչում է Ադրբեջանի տարածքային ամբողջականությունը 86 հազար 600 քառակուսի կիլոմետր տարածքով՝ ներառյալ Լեռնային Ղարաբաղը։ Ու թեև Ադրբեջանի նախագահը ներկա չէր բանակցություններին, այդուհանդերձ, քառակողմ հանդիպման արդյունքներով ընդունված հայտարարության տեքստում հստակ ընդգծվում և կարևորվում է Հայաստանի՝ 29 հազար 800 քառակուսի կմ տարածքային ամբողջականությունը ճանաչելու՝ Բաքվի հանձնառությունը։
Չնայած այս հայտարարություններին՝ Ալիևն անձամբ մինչ այժմ հստակ տարածք նշելով հրապարակային չի հայտարարել, որ ճանաչում է Հայաստանի տարածքային ամբողջականությունը։ Արևմտյան առաջնորդները երեկ առանց նրա ներկայության իրենց անսասան աջակցությունը հայտնեցին Հայաստանի անկախությանը, ինքնիշխանությանը, տարածքային ամբողջականությանը և սահմանների անձեռնմխելիությանը։
Չնայած Գրանադայի հանդիպումը դեռևս ամիսներ առաջ էր ծրագրված, իսկ վերջին տասնօրյակում դրա նախապատրաստման ուղղությամբ աշխատանքներ էին տարվել, այդուհանդերձ, հանդիպումից ժամեր առաջ Ալիևը չեղարկեց մասնակցությունը՝ որպես հիմնավորում ներկայացնելով Ֆրանսիայի հայամետ դիրքորոշումը, նաև բանակցություններին Թուրքիայի մասնակցության հետ կապված Բեռլինի և Փարիզի անհամաձայնությունը։
Մինչ Գրանադայում ընդունված հայտարարությունների առնչությամբ պաշտոնական Բաքուն լուռ է, Հայաստանի իշխանության տարբեր ներկայացուցիչներ երեկվանից սոցիալական ցանցերի իրենց էջերում գրառումներ են անում՝ Գրանադայի քառակողմ հայտարարությունը որակելով «լուրջ հաղթանակ»։ Այս գնահատականի հիմքում, ըստ էության, Հայաստանի տարածքային ամբողջականությանն աջակցելու վերաբերյալ արևմտյան առաջնորդների հայտարարություններն են։
Քաղաքագետ Արեգ Քոչինյանը չի շտապում եզրակացնել, թե Հայաստանի տարածքային ամբողջականությանն աջակցելու շուրջ կա հստակ ձևավորված միջազգային կոնսոլիդացիա։
Նիկոլ Փաշինյանի աշխատակազմի ղեկավար Արայիկ Հարությունյանը Ֆեյսբուքի իր էջում անգամ գրեց, թե Հայաստանը Գրանադայում ինչ ցանկացել է, ստացել է՝ հասնելով լուրջ հաղթանակի։ Թե կոնկրետ ինչի մասին է խոսքը, պարզ չէ, հարցի առնչությամբ այսօր չհաջողվեց մանրամասներ պարզել նաև իշխանական պատգամավորներից։ Փաշինյանի աշխատակազմի ղեկավարը նույն գրառմամբ ևս մեկ հայտարարություն արեց՝ պնդելով, թե միջանցքի թեման փակ է՝ կրկին առանց մանրամասների։
Քառակողմ հայտարարությամբ կոչ է արվել ավելի մեծ տարածաշրջանային համագործակցության, որը հիմնված կլինի երկրների ինքնիշխանության և իրավազորության լիակատար հարգման, ինչպես նաև հավասարության և փոխադարձության սկզբունքների վրա։
Մանրամասները՝ տեսանյութում։
Շողիկ Գալստյան
