Քաղաքականություն
05.10.2023 | 23:30
Բաքուն արդարացումներ է փնտրում Գրանադայի բանակցություններից հրաժարվելուց հետո։ Մասնավորապես, Ադրբեջանի նախագահի օգնական Հիքմեթ Հաջիևը հայտարարել է, թե այն, որ Ադրբեջանը հրաժարվել է մասնակցել Գրանադայում Եվրամիության, Ֆրանսիայի և Գերմանիայի ղեկավարների մասնակցությամբ Հայաստանի վարչապետ Նիկոլ Փաշինյանի հետ հնգակողմ հանդիպումից, չի նշանակում, որ Բաքուն ընդհանրապես հրաժարվում է Հայաստանի հետ բանակցություններից։
Հաջիևն ասել է, թե Ադրբեջանի այս որոշումը կապված է, իբր, «Ֆրանսիայի կողմնակալ գործողությունների և ռազմատենչ քաղաքականության հետ, որոնք լրջորեն խաթարում են տարածաշրջանային խաղաղությունը, կայունությունը Հարավային Կովկասում և վտանգում ԵՄ ընդհանուր քաղաքականությունը տարածաշրջանի նկատմամբ»։ Նաև, չնայած պաշտոնական Բաքվի համառ պահանջներին, համաձայնություն ձեռք չի բերվել այս հանդիպմանը Թուրքիայի՝ որպես տարածաշրջանային տերության մասնակցության վերաբերյալ։
«Միջազգային որոշ լրատվամիջոցներում դա սխալ է ներկայացվում՝ որպես Հայաստանի հետ բանակցելուց Ադրբեջանի հրաժարում, ինչը լիովին սուտ է»,- դժգոհել է Հաջիևը։
Հավելենք, որ այսօր Գրանադայում Եվրոպական քաղաքական համայնքի համաժողովի շրջանակում նախատեսվում էր ՀՀ վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, ԵՄ Խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը, սակայն Բաքուն հրաժարվել է մասնակցել։
Էմմա Չոբանյան
