Ֆինլանդիան գաղտնի ամրություններ է կառուցում Ռուսաստանի հետ սահմանին

Ֆինլանդիայի պաշտպանության ուժերը գաղտնի պայմանագրեր են կնքում մասնավոր հողատերերի հետ՝ Ռուսաստանի հետ սահմանին ամրություններ կառուցելու և զորավարժություններ անցկացնելու համար, գրում է The Moscow Times-ը։

Առաջին պայմանագրերը ստորագրվել են վեց տարի առաջ, բայց միայն Ուկրաինայում պատերազմի մեկնարկից հետո այս ուղղությամբ աշխատանքները սկսեցին արագ ընթանալ։

«Մոտեցումներն ակնհայտորեն ավելի դրական են դարձել: Մարդիկ հասկացել են, թե ինչ է ասվում հողօգտագործման պայմանագրում»,- նշել են պաշտպանական ուժերի մարտական պատրաստության վարչությունից։

Նախքան համաձայնագրեր կնքելը՝ ֆիննական բանակը մատնանշել է առանցքային տարածքները, որտեղ անհրաժեշտ էր հնարավորինս արագ ամրություններ կառուցել: Համաձայնագրերն ու ամրությունների տեղակայման մասին տեղեկությունները գաղտնի են: Հայտնի է միայն, որ այն հողերը, որտեղ դրանք կառուցվում են, գտնվում են Արևելյան Ֆինլանդիայում։

Ֆիննական բանակի և հողատերերի միջև ստանդարտ պայմանագիրը գործում է 20 տարի: Այն ստորագրելուց հետո հողամասի սեփականատերը իրավունք ունի միանվագ 750 եվրո վճար ստանալ։ Ամրաշինությունների կառուցման համար օգտագործվող յուրաքանչյուր հեկտարի համար նույնպես վճարվում է 4,8 հազար եվրո։ Վերջնական գումարը կախված է հողամասի մակերեսից։

Համաձայնագիրը բանակին իրավունք է տալիս կառուցել պաշտպանական կառույցներ, բայց այնպես, որ դրանք «չխաթարեն գույքի բնականոն օգտագործումը»։ Սա չի բացառում ծառերի ու թփերի հատում։ Նաև տարվա մեջ 14 օր զինվորականները և սահմանապահները կարող են վարժանքներ անցկացնել վարձակալված տարածքում։