Էդմոն Մարուքյանն արձագանքել է Հիքմեթ Հաջիևի կեղծիքներին

ՀՀ հատուկ հանձնարարություններով դեսպան Էդմոն Մարուքյանն անդրադարձել է Ադրբեջանի նախագահի օգնական Հիքմեթ Հաջիևի հնչեցրած կեղծիքներին, թե, իբր, հայերն ինքնակամ են հեռանում Արցախից։

«Ադրբեջանի նախագահի օգնականը Deutsche Welle-ին տված հարցազրույցում պնդում է, թե մարդիկ «ազատ կերպով» հեռանում են Լեռնային Ղարաբաղից։ Ուզում եմ հասկանալ՝ կա՞ աշխարհում որևէ մեկը, ով հավատում է Ադրբեջանի հերթական կեղծ նարատիվին»,- գրել է Մարուքյանը X-ի իր էջում՝ ներկայացնելով, թե ինչ միջոցներով է Ադրբեջանն էթնիկ զտում իրականացնում Արցախում։

«1. Մարդիկ հեռանում են, քանի որ նրանց վրա հարձակվել են ադրբեջանցի զինվորականները։

2. Մարդիկ հեռանում են, քանի որ նրանց քաղաքներն ու գյուղերը օկուպացված են Ադրբեջանի զինված ուժերի կողմից։

3. Մարդիկ հեռանում են, քանի որ ո՛չ միջազգային հանրությունը, ո՛չ էլ Ադրբեջանը չեն երաշխավորում նրանց իրավունքներն ու անվտանգությունը։

4. Մարդիկ հեռանում են, քանի որ Ադրբեջանը 10 ամիս շարունակ շրջափակման և սովի մեջ է պահել 120,000 մարդու, այդ թվում՝ 30,000 երեխաների՝ էթնիկ զտումների իր քաղաքականության շրջանակում։

5. Մարդիկ հեռանում են, քանի որ 2016-2020 թվականներին Ադրբեջանի ռազմական հանցագործությունների համար ոչ ոք չի պատժվել, և չկա երաշխիք, որ գլխատողներն ազատորեն չեն շրջում այդ տարածքներում՝ նոր մարդկանց գլխատելու»,- գրել է Մարուքյանը՝ հավելելով, որ ավելի քան պարզ է, թե ինչու են մարդիկ հեռանում։

Էմմա Չոբանյան