Սամանթա Փաուերը Ալիևի հետ քննարկում է ունեցել

ԱՄՆ Միջազգային  զարգացման գործակալության (USAID) ղեկավար Սամանթա Փաուերի գլխավորած պատվիրակությունը, որը Երևանից մեկնել էր Բաքու, նախօրեին  հանդիպել է Ադրբեջանի նախագահ Իլհամ Ալիևին։  Պատվիրակության կազմում են եղել նաև պետքարտուղարի օգնականի պաշտոնակատար Յուրի Քիմը և Կովկասի բանակցությունների գծով ավագ խորհրդական Լուի Բոնոն:

Ամերիկյան կողմի տարածած հաղորդագրության համաձայն՝ քննարկման առանցքը Լեռնային Ղարաբաղում հրատապ հումանիտար իրավիճակն է եղել։ Նշվում է, որ այս հանդիպումը հաջորդել է Փաուերի և պետքարտուղարի օգնականի պաշտոնակատար Քիմի այցին Երևան և Ադրբեջանի հետ սահմանամերձ շրջաններ, որտեղ վերջին մի քանի օրվա ընթացքում ավելի քան 50,000 էթնիկ հայեր Լեռնային Ղարաբաղից անցել են Հայաստան:

«Ադմինիստրատորն ընդգծել է Լեռնային Ղարաբաղ անխոչընդոտ հումանիտար մուտքի անհրաժեշտությունը, նաև՝ Լաչինի միջանցքում մնացած անձանց և մարդասիրական խմբերի ընդլայնված մուտքի հրատապ անհրաժեշտությունը: Նրանք քննարկել են Լեռնային Ղարաբաղում  տեղում միջազգային դիտորդների անհրաժեշտությունը՝ ստուգելու, թե արդյո՞ք հարգվում են մարդկանց իրավունքները, արդյո՞ք  մշակութային և կրոնական վայրերը պաշտպանված են։ Փաուերը նշել է նախագահ Ալիևի հանձնառությունը պաշտպանելու էթնիկ հայերի իրավունքները և անվտանգությունը, և երկուստեք քննարկվել են քայլերը, որոնք ցույց կտան այդ հանձնառությունը պահպանելու Ադրբեջանի կառավարության մտադրությունը: Փաուերը վերահաստատել է Հայաստանի ինքնիշխանության և տարածքային ամբողջականության հարգման կարևորությունը,-ասվում է հայտարարության մեջ։

Նրանք նաև խոսել են երկարաժամկետ խաղաղ բանակցություններին կողմերի վերահաստատման կարևորության և այդ գործընթացին աջակցելու Միացյալ Նահանգների շարունակական պատրաստակամության մասին։

Ըստ ադրբեջանական կողմի հաղորդագրության՝ Ալիևը նշել է, որ Բաքուն պատրաստ է մոտ ապագայում կազմակերպել Ադրբեջանում հավատարմագրված ՄԱԿ-ի մշտական ​​համակարգողի գրասենյակի այցը Լեռնային Ղարաբաղ։