30.05.2026 | 19:53
«Յունիսպորտը»` ֆուտզալի Հայաստանի չեմպիոն. ՏԵՍԱՆՅՈՒԹ
Վագներականների մի մասը կրկին մեկնել է ռազմաճակատ․ Ուկրաինայի ԶՈւ
Քաղաքականություն
27.09.2023 | 22:24
Ռուսական «Վագներ» ռազմականացված խմբի որոշ վարձկաններ, որոնք մեկնել են Բելառուս, պայմանագրեր են կնքել ՌԴ ՊՆ-ի հետ և այժմ կրկին տեղակայվել են Ուկրաինայում։ Այս մասին հայտնել է Ուկրաինայի զինված ուժերի Արևելյան ուժերի խմբի հրամանատարության ներկայացուցիչ Իլյա Եվլաշը, գրում է BBC-ի ռուսական ծառայությունը։
Ավելի վաղ այս տարածքում կռվող Ուկրաինայի ԶՈւ 92-րդ բրիգադի օդային հետախուզության օպերատորը CNN-ին հայտնել էր, որ «Վագներ»-ի զինյալները կրկին հայտնվել են Դոնեցկի շրջանի Բախմուտի մոտակայքի մարտադաշտում։
««Վագներ» ռազմականացված խմբավորման նախկին աշխատակիցներն այժմ փաստացի ներկա են զորքերի Արևելյան խմբի տարածքում։ Նրանք մասնակցում են ռազմական գործողություններին։ Մասնավորապես նրանք գալիս են Բելառուսի տարածքից, որտեղ իրենց ճամբարներն էին»,- ասել է Եվլաշը «Ուկրաինսկայա պրավդա»-ին։
Նրա խոսքով՝ այժմ «Վագների» ստորաբաժանումները լուծարվում են, և նրանցից ոմանք պայմանագրեր են կնքում ՌԴ ՊՆ-ի հետ՝ Ուկրաինայի դեմ պատերազմին տարբեր պաշտոններում, մասնավորապես՝ որպես հրահանգիչներ մասնակցելու համար։
Նրանցից ոմանք մտնում են կանոնավոր մարտական ստորաբաժանումների կազմի մեջ։
«Նրանք այնպիսի վտանգ չեն ներկայացնում, ինչպես, օրինակ, մեկ տարի առաջ՝ իրենց առաջնորդ Եվգենի Պրիգոժինի կորստի պատճառով»,- հավելել է Եվլաշը։
