05.04.2026 | 16:15
Իսրայելը հայտնել է մեկ օրում Իրանում ավելի քան 120 օբյեկտների ուղղությամբ գրոհների մասին
ՌԴ ԱԳՆ-ն՝ տարածաշրջանում հաղորդակցությունների ապաշրջափակման մասին․ ՏԵՍԱՆՅՈՒԹ
Քաղաքականություն
27.09.2023 | 15:01
ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է տարածաշրջանում հաղորդակցությունների ապաշրջափակմանն ու նշել, որ ՀՀ-ն և Ադրբեջանը ճանաչել են միմյանց տարածքային ամբողջականությունն ու իրենց գործնական քայլերում պետք է առաջնորդվեն այդ սկզբունքով։
«Հայաստանն ու Ադրբեջանը ճանաչել են միմյանց տարածքային ամբողջականությունը, և նրանք իրենց գործնական գործողություններում առաջնորդվելու են այս սկզբունքով։ Այդ մասին հայտարարել են կողմերը», – ասել է Զախարովան։
Ինչ վերաբերում է տարածաշրջանում տրանսպորտային հաղորդակցությունների ապաշրջափակման թեմային, ապա այս հարցն ամենայն ուշադրությամբ քննարկվում է եռակողմ աշխատանքային խմբի միջոցով, որը համանախագահում են Ռուսաստանի, Ադրբեջանի և Հայաստանի փոխվարչապետները, նշել է Զախարովան։ Նրա խոսքով՝ Մոսկվան համոզված է, որ հենց այս ձևաչափով պետք է փոխադարձ ընդունելի լուծում գտնել։
«Նման համաձայնագրերը, որոնք հիմնված են շահերի հավասարակշռության վրա, օգուտ կբերեն ինչպես տարածաշրջանի պետություններին, այնպես էլ նրանց հարևաններին, այդ թվում՝ Ռուսաստանին, Իրանին և Թուրքիային»,- ասել է Զախարովան։
Ըստ նրա՝ ռուսական կողմը շահագրգռված է Անդրկովկասում կայուն իրավիճակով, կողմնակից է բոլոր վիճելի հարցերը լուծել բացառապես քաղաքական և դիվանագիտական միջոցներով։
«Միևնույն ժամանակ, և՛ Հայաստանը, և՛ Ադրբեջանը մեզ դաշնակից պետություններ են, մենք պարտավորված ենք անվտանգության ոլորտում Երևանի հետ՝ և՛ երկկողմ ձևաչափով, և՛ ՀԱՊԿ ձևաչափով։ Բաքվի հետ հաջողությամբ իրականացվում է Դաշնակցային համագործակցության մասին հռչակագիրը, որը Մոսկվայում 2022 թվականի փետրվարի 22-ին ստորագրվել է ամենաբարձր մակարդակով»,- նշել է Զախարովան։
Մանրամասները՝ տեսանյութում։
