10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
Գագիկ Ծառուկյանը ՀՖՖ նախագահի թեկնածո՞ւ․ խոսնակը պարզաբանում է
Հասարակություն
20.07.2018 | 17:36
ՀԱՕԿ-ի նախագահ Գագիկ Ծառուկյանը Հայաստանի ֆուտբոլի ֆեդերացիայի նախագահի պաշտոնին երբևէ չի հավակնել և այս պահին էլ նման ցանկություն չունի։ Այս մասին Factor.am-ի հետ զրույցում ասաց Գագիկ Ծառուկյանի մամուլի խոսնակ Իվետա Տոնոյանն՝ ի պատասխան հարցի՝ արդյոք Գագիկ Ծառուկյանը պատրաստվո՞ւմ է առաջադրել իր թեկնածությունը ՀՖՖ նախագահի պաշտոնում։
Խոսնակը նաև նշեց, որ ՀԱՕԿ-ի նախագահի մոտ այդ թեմայով քննարկումներ չեն եղել, և նման հարց նրա օրակարգում չկա։
Հիշեցնենք, որ երեկ Կառավարության նիստից առաջ լրագրողների հետ զրույցում Ազգային անվտանգության ծառայության տնօրեն Արթուր Վանեցյանն այս հարցի վերաբերյալ նշել էր․ «Հայաստանի ֆուտբոլի ֆեդերացիայի պաշտոնն զբաղեցնելու վերջնական որոշում դեռևս չունեմ, չեմ թաքցնում`ունեմ ցանկություն»։
Նշենք նաև, որ Հայաստանի ֆուտբոլի ֆեդերացիայի երկրպագուների «Առաջին ճակատ»շարժումը՝ ՖԱՖ-ը, հանդես է եկել հայտարարությամբ, որում մասնավորապես ասված էր․ «ՀՖՖ նախագահի հաջորդիվ կայանալիք ընտրություններում հնարավորինս սատարելու ենք Յուրի Ջորկայեֆի թեկնածությունը»:
Ի դեպ, երեկ լրագրողների հետ զրույցում Արթուր Վանեցյանն ասել էր, որ, եթե Յուրի Ջորկայեֆը համաձայնի ստանձել Հայաստանի ֆուտբոլի ֆեդերացիայի ղեկավարի պաշտոնը, ապա ինքն այդժամ չի առաջադրվի։
Հավելենք նաև, որ ՀՖՖ-ի նախագահի պաշտոնում Արթուր Վանեցյանի թեկնածության պաշտպանությամբ են հանդես եկել «Արարատ», «Արցախ» և «Շիրակ» ֆուտբոլային ակումբները։
Աղավնի Սուքիասյան
