20.06.2026 | 09:30
Էլինա Ավանեսյանն օգնել է Հայաստանի հավաքականին հաղթել Բիլի Ջին Քինգի գավաթի խմբում
ՀՀ շտապօգնության որևէ մեքենա այս պահին մուտք չի գործել Արցախ
23.09.2023 | 11:38
«Գորիսից Արցախ տանող մայրուղու առաջին անցակետի մոտ հերթապահող ոստիկանների տվյալներով՝ այս պահի դրությամբ շտապօգնության որևէ մեքենա Հայաստանից մուտք չի գործել Արցախ»,- այս մասին անցակետից հայտնում է FactorTV-ի թղթակիցը։
Երեկ Արցախի Առողջապահության նախարար Վարդան Թադևոսյանը հայտնել էր, որ աշխատանք է տարվում ծանր վիրավորում ունեցող 30-ից ավել արցախցու Հայաստան տեղափոխելու ուղղությամբ:
«Ուրախ եմ, որ ԿԽՄԿ-ն համաձայնություն է տվել ուղեկցելու այդ գործընթացը: Մեքենաները Հայաստանից կգան Ստեփանակերտ և կտեղափոխեն վիրավորներին»,- Արցախի հանրային հեռուստաընկերությանը տված հարցազրույցում ասել էր նախարարը։
Տեղեկություններ էին շրջանառվում, որ Երևանից ժամանած շտապօգնության մեքենաները Գորիս են հասել։ FactorTV-ի թղթակիցն այցելել է Գորիսի բժշկական կենտրոն, որտեղից տեղեկացրել են, որ այս պահին մեքենաները դեռ այնտեղ չեն։
Հիշեցնենք՝ երեկ մի խումբ բժիշկներ ակցիա էին իրականացնում Կարմիր խաչի միջազգային կազմակերպության հայաստանյան գրասենյակի դիմաց։ Նրանք պահանջում էին Արցախից դուրս բերել վիրավորներին, կամ իրենց տանել Արցախ՝ վիրավորներին բուժօգնություն ցուցաբերելու համար։ Ավելի ուշ, ակցիայի մասնակից բժիշկներին ընդունեցին Կարմիր խաչի ներկայացուցիչները՝ քննարկելու նրանց պահանջները, սակայն, ակցիայի մասնակից բժիշկները բավարարված չէին հանդիպման արդյունքներից. նրանց խնդրանք-պահանջին որևէ ընդառաջում չէր տրվել։
