Արցախյան կողմի բանակցողը «Ռուսաստանի հայերի միության» ԼՂ մասնաճյուղի տնօրենն է

Արդեն հայտնել էինք, որ Եվլախում արցախյան կողմի և Բաքվի ներկայացուցիչների հանդիպմանը հայկական կողմի ներկայացուցիչը Արցախի ԱԺ արտաքին հարաբերությունների մշտական հանձնաժողովի անդամ Դավիթ Մելքումյանն է։ Ստորև ներկայացնում ենք Դավիթ Մելքումյանի կենսագրությունը, որը հրապարակվել է Արցախի ԱԺ-ի կայքում։

Դավիթ Մելքումյանը ծնվել է 1980թ. հոկտեմբերի 29-ին Ստեփանակերտ քաղաքում: 1987թ. ընդունվել է Ավ. Իսահակյանի անվան հ. 10 միջնակարգ դպրոցը, 1995թ. տեղափոխվել Վ. Ջհանգիրյանի անվան համար 11 միջնակարգ դպրոց, որն ավարտել է 1997թ.: 2004թ. ավարտել է «Մեսրոպ Մաշտոց» համալսարանի պատմության և միջազգային հարաբերությունների ֆակուլտետը:

2006թ. ավարտել է նույն համալսարանի իրավագիտության ֆակուլտետը` միաժամանակ գլխավորելով բուհի ուսանողական խորհուրդը:

1998-2000 թթ. ծառայել է ԼՂՀ ՊԲ-ում՝ որպես հրետանային հետախույզ: 2004թ-ից նախաձեռնում և համակարգում է միջազգային YMCA (ԵՄՔԸ) կազմակերպության Արցախի մասնաճյուղի աշխատանքները` հանրապետության ողջ տարածքում իրականացնելով երիտասարդական տարբեր միջոցառումներ (թրեյնինգներ, կլոր սեղաններ, ամառային ճամբարներ, միջազգային փառատոններ):
2008 թ-ից՝ ԼՂՀ հասարակական կազմակերպությունների խորհրդի անդամ 2010 թ. սեպտեմբեր՝ CMI (Crisis Management Initiative) միջազգային կազմակերպության խորհրդական:

Զբաղվում է ԼՂ հակամարտության լուծման ուղղությամբ քաղաքացիական ծրագրերի համակարգմամբ:
2000-2010 թթ. Արցախի հանրային հատվածը ներկայացրել է արտասահմանյան մի շարք երկրներում` Ռուսաստանի Դաշնություն, Անգլիա, Ֆրանսիա, Գերմանիա, Իտալիա, Ավստրիա, Լատվիա, Վրաստան, Նեպալ, Թուրքիա, Արաբական Միացյալ էմիրություններ, Իռլանդիա, Չեխիա, Ուկրաինա, Բելգիա, Նիդեռլանդներ, Հունգարիա և այլն:

2010թ-ից «Ռուսաստանի հայերի միություն» կազմակերպության ԼՂՀ մասնաճյուղի տնօրենն է, 2005թ-ից՝ Արցախի ժողովրդավարական կուսակցության անդամ 2015թ. մայիսի 3-ի ԼՂՀ ԱԺ ընտրություններում մեծամասնական ընտրակարգով թիվ 1 ընտրատարածքից ընտրվել է ԱԺ պատգամավոր:

2015-2020թթ․՝ ԱԺ արտաքին հարաբերությունների մշտական հանձնաժողովի նախագահի տեղակալ։ 2020թ․ մարտի 31-ի խորհրդարանական ընտրություններում Արցախի ժողովրդավարական կուսակցության համամասնական ցուցակով ընտրվել է ԱՀ 7-րդ գումարման Ազգային ժողովի պատգամավոր:

Ամուսնացած է, ունի մեկ որդի:

Եվլախի բանակցություններում ադրբեջանական կողմի ներկայացուցիչը Ադրբեջանի Մեջլիսի պատգամավոր Ռամին Մամեդովն է։ Բանակցություններին մասնակցում է նաև ռուս խաղաղապահ զորակազմի ներկայացուցիչը։

Անի Թամրազյան