12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Արդյո՞ք ՀՀ-ում քննարկվում է արցախահայերի հնարավոր մուտքը Հայաստան կազմակերպելու հարցը
Հասարակություն
20.09.2023 | 15:55
Ադրբեջանի կողմից սանձազերծած հերթական պատերազմի հետևանքով Արցախի՝ Ասկերանի, Մարտակերտի, Մարտունու, Շուշիի շրջանների 16 քաղաքացիական համայնքներից տարհանվել է ավելի քան 7 հազար մարդ։ Իրենց հերիթին՝ որոշ արցախցիներ սեփական նախաձեռնությամբ ճանապարհվել են դեպի օդանավակայան՝ Արցախում ռուս խաղաղապահների տեղակայման վայր՝ ակնկալելով ռուս խաղաղապահների աջակցությունը: Ավելի ուշ Ստեփանակերտի քաղաքապետարանը հաղորդագրություն տարածեց հայտնելով՝ այս պահին տեղաշարժի անհրաժեշտություն չկա, պետք է պահպանել անվտանգության կանոնները և մնալ ապաստարաններում:
ՀՀ-ն արդյո՞ք ծրագրեր մշակել է, թե ինչպես է կազմակերպելու արցախցիների հնարավոր ներհոսքը, որտե՞ղ են տեղավորելու և ի՞նչ օժանդակության ծրագրեր են նախատեսվում։ ՀՀ ՆԳՆ միգրացիայի և քաղաքացիության ծառայության մամուլի քարտուղար Նելլի Դավթյանը Factor TV-ի հետ զրույցում հայտնեց․ «Քննարկումներ են տեղի ունենում»,- այս պահին զերծ մնալով այլ մանրամասներ հայտնելուց։
Հիշեցնենք՝ Սեպտեմբերի 19-ից ադրբեջանական զինված ուժերը հրետակոծում են Լեռնային Ղարաբաղի քաղաքացիական բնակավայրերը՝ թիրախավորելով քաղաքացիական բնակչությանն ու ենթակառուցվածքները՝ բնակելի շենքեր, դպրոցներ և այլն։ Ադրբեջանական զինված ուժերը քաղաքացիական բնակչության ուղղությամբ կիրառում են խոշոր տրամաչափի զենքեր, այդ թվում՝ հրետանի։ ՀՀ մարդու իրավունքների պաշտպանի աշխատակազմում գրանցված տեղեկությունների համաձայն՝ հրետակոծությունների հետևանքով առավոտվա տվյալներով կա 32 զոհ, 200-ից ավելի վիրավոր, այդ թվում՝ 7 զոհ (2 երեխա) և 35 վիրավոր (13 երեխա) քաղաքացիական բնակչության շրջանում։
Ժամեր առաջ Արցախի տեղեկատվական շտաբը հայտարարություն տարածեց այն մասին, որ Արցախի Հանրապետության իշխանություններն ընդունել են ռուսական խաղաղապահ առաքելություն իրականացնող զորակազմի հրամանատարության առաջարկությունը՝ կրակի դադարեցման վերաբերյալ
Ըստ ռուսական կողմի առաջարկի՝ 2023թ․ սեպտեմբերի 20-ին 13։00-ից սկսած ուժի մեջ կմտնի ամբողջական հրադադարը։ «Լեռնային Ղարաբաղի պաշտպանության բանակը ամբողջությամբ կլուծարվի և կզինաթափվի, իսկ ռազմական տեխնիկան դուրս կբերվի Ղարաբաղից և շուտափույթ կոչնչացվի։ Լեռնային Ղարաբաղի հայության իրավունքների և անվտանգության հարցերը Ադրբեջանի սահմանադրության շրջանակներում կքննարկվեն սեպտեմբերի 21-ին Եվլախում՝ Արցախի և Ադրբեջանի ներկայացուցիչների հանդիպման ժամանակ»,- ասված է Արցախի տեղեկատվական շտաբի հաղորդագրության ռուսալեզու տարբերակում։
Ռոզա Վարդանյան
