Կոնստանտինովկայի շուկայում պատահարի պատճառը, ամենայն հավանականությամբ, «Բուկ»-ից արձակված ուկրաինական հրթիռն է․ NYT

Ամերիկյան New York Times-ը հրապարակել է հետաքննություն, որի հեղինակները եզրակացրել են, որ Դոնեցկի մարզի Կոնստանտինովկա քաղաքի շուկայում տեղի ունեցած պայթյունը, ամենայն հավանականությամբ, «Բուկ» հակաօդային պաշտպանության համակարգից արձակված և կուրսից շեղված ուկրաինական հրթիռի պատճառով է։

Նշենք, որ Կոնստանտինովկայում սեպտեմբերի սկզբին տեղի ունեցած հրթիռի պայթյունի հետևանքով զոհվել է առնվազն 15 մարդ, վիրավորվել՝ ավելի քան 30-ը։ Ուկրաինայի նախագահ Վլադիմիր Զելենսկին հարվածի համար մեղադրել է ռուսական բանակին։ Սակայն New York Times-ի լրագրողներն այլ եզրակացություններ են արել՝ ուսումնասիրելով ականատեսների վկայությունները, հրթիռի բեկորները և տեղանքում արձակման մասին վկայող հետքերը։

NYT-ի հրապարակման հեղինակները հիշեցնում են, որ «Ուկրաինա ներխուժման ժամանակ Ռուսաստանը բազմիցս և համակարգված հարձակվել է խաղաղ բնակչության վրա և հարվածներ հասցրել դպրոցներին, շուկաներին և բնակելի շենքերին, ինչը բնակչությանն ահաբեկելու միտումնավոր մարտավարության մի մասն է»։

Նույն Կոնստանտինովկայում ապրիլին ռուսական բանակը գնդակոծել էր բնակելի շենքերը և մանկապարտեզը, ինչի հետևանքով վեց մարդ էր զոհվել, ասվում է հրապարակման մեռջ։

Սակայն Կոնստանտինովկայում սեպտեմբերի 6-ին տեղի ունեցած ողբերգության հանգամանքները խոսում են այն մասին, որ շուկայում ուկրաինական հրթիռ է պայթել, նշում են NYT-ի լրագրողները։

«Հարվածից անմիջապես հետո ուկրաինական իշխանությունները փորձել են կանխել New York Times-ի լրագրողների մուտքը տուժած տարածք կամ հասանելիությունը հրթիռի բեկորներին: Սակայն ավելի ուշ լրագրողները եղել են դեպքի վայրում, զրուցել են ականատեսների հետ և հավաքել օգտագործված զենքի մասերը»,- ասվում է հետաքննությունում։

Ուկրաինայի զինված ուժերի պաշտոնական ներկայացուցիչը պարբերականին հայտնել է, որ երկրի հատուկ ծառայությունները հետաքննում են միջադեպը, և հրաժարվել է այլ մեկնաբանություններ տալ՝ վկայակոչելով ուկրաինական օրենքները։