Ադրբեջանի ԱԳՆ-ն հավաքել է օտարերկրյա դիվանագետներին՝ Հայաստանին պահանջներ և Արցախին «համաներման» պայման ներկայացնելու

Ադրբեջանի ԱԳՆ-ն այսօր հերթական քարոզչական շոուն է կազմակերպել երկրում հավատարմագրված դիվանագիտական կորպուսի ներկայացուցիչների համար։ Ինչպես միշտ՝ հանդիպմանը գլխավոր դերերում եղել են Ադրբեջանի նախագահի օգնական Հիքմեթ Հաջիևն ու նախագահի հատուկ հանձնարարություններով ներկայացուցիչ Էլչին Ամիրբեկովը, ինչպես նաև արտաքին գործերի փոխնախարար Ֆարիզ Ռզաևը։

Ադրբեջանը, որն արդեն մեկ ամիս է՝ ծանր զինտեխնիկա է կուտակում Հայաստանի հետ սահմանին ու ամենօրյա ռեժիմով ռազմական ագրեսիայի սպառնալիքներ հնչեցնում, Հայաստանին է մեղադրել սադրանքների մեջ։

«Վերջին օրերին նկատվում է ռազմական սադրանքների ակտիվացում, որն ուղեկցվում է ռազմական ինժեներական և այլ ռազմական շինարարական աշխատանքների աճով՝ ինչպես Ադրբեջանի և Հայաստանի միջև սահմանի երկայնքով, այնպես էլ Ղարաբաղի շրջանում: Հայաստանը բացահայտ նոր խրամատներ, ամրություններ է փորում հերթական ռազմական հարձակման համար»,- հայտարարել են ադրբեջանցի պաշտոնյաները։

Նշվել է, որ «Հայաստանը և խունտան (նկատի ունեն Արցախը), որին նա շարունակում է պահպանել Ադրբեջանի ինքնիշխան տարածքներում բոլոր հնարավոր գաղափարական, քաղաքական, ռազմական, ֆինանսական և այլ միջոցներով», պետք է դիմակայեն միջազգային հանրության միակ հստակ դիրքորոշմանը, որ հենվելով նախկին՝ ժամանակ ձգելու տակտիկային՝ չեն ստանա ցանկալին։

Թեպետ միջազգային միջնորդների կողմից ևս բազմիցս փաստվել է, որ հենց Բաքուն է խախտել նախկինում ձեռք բերված մի շարք պայմանավորվածություններ, Ադրբեջանը հիմա փորձում է Հայաստանին մեղադրել դրանում։

«Մենք նաև պահանջում ենք անհապաղ սկսել հայ զինվորականների դուրսբերումը, լուծարել Հայաստանին ենթակա խամաճիկ ռեժիմի ռազմական և, այսպես կոչված, կառավարական կառույցները և զինաթափել այդ տարածքներում ապօրինի կերպով տեղակայված հայկական բոլոր զինված ուժերին։ Այդ դեպքում անօրինական ռեժիմի, այսպես կոչված, ներկայացուցիչների նկատմամբ կարող է համաներում կիրառվել»,- հայտարարել են Բաքվի ներկայացուցիչները։

Էմմա Չոբանյան