15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Ադրբեջանի որոշ շրջաններում արտակարգ իրավիճակ է, հեղեղներից կամուրջներ են փլուզվել․ ԼՈՒՍԱՆԿԱՐՆԵՐ
Քաղաքականություն
18.09.2023 | 14:48
Ադրբեջանի մի շարք շրջաններում արտակարգ իրավիճակ է։ Մասնավորապես, տեղական լրատվամիջոցների հաղորդմամբ, երեկ երեկոյան սկսված հորդառատ անձրևների հետևանքով ջրհեղեղներ են Աստարայի և Լենքորանի շրջաններում։ Բնակելի շենքեր, տներ ու թաղամասեր են հեղեղվել։
Հաղորդվում է, որ լեռնային գետերում ջրի մակարդակը կտրուկ բարձրացել է։
Հզոր ջրհեղեղը Վագո գյուղում կամուրջ է փլուզել, վնասվել է նաև Պենսար-Թորադի ճանապարհը, ընդհատվել է կապը 10-ից ավելի գյուղերի հետ։ Նշվում է, որ Աստարայի շրջանում 40 գյուղ ճանապարհային հաղորդակցություն չունի։
Հեղեղումներ են նկատվում նաև Պենսարչայ գետում, ընդհատվել է ճանապարհային հաղորդակցությունը մի քանի գյուղերի հետ։ Ըստ նախնական տեղեկությունների՝ ջրհեղեղը մի քանի այլ գյուղերի կամուրջներ ևս փլուզել է, լուրջ վնասներ են հասցվել գյուղացիական տնտեսություններին։
Իրավիճակը գնալով ճգնաժամային է դառնում։ Մասնավորապես, Զունգյուլեշ գյուղում գտնվող Աստարայի փոքր հիդրոէլեկտրակայանի ամբարտակը փլուզման վտանգի տակ է։ Ներկայում ջուրը լցվում է ամբարտակի վերին հատվածից՝ մոտավորապես 2 մետր բարձրության վրա։
Հիշեցնենք, որ ուժեղ հեղեղներից օրերս Ադրբեջանում ևս մեկ կամուրջ էր փլուզվել․ ՌԴ տանող Գենդոբ-Խաչմազ-Յալամա պետական ճանապարհին փլուզվել էր Գուդիալչայ գետի վրա 1974 թվականին կառուցված կամուրջը, որի հետևանքով երեք մարդ էր վիրավորվել։
Հաղորդվում է, որ հորդառատ տեղումները շարունակվում են։
Էմմա Չոբանյան
