Ո՞վ և ե՞րբ է պատրաստվում ներողություն խնդրել զորավարժությունների պատճառով Փանիկի գյուղացիներին անհանգստություն պատճառելու համար. Զարուհի Փոստանջյանը դիմել է պաշտոնյաների

Երևանի ավագանու  «Երկիր Ծիրանի» խմբակցության ղեկավար Զարուհի Փոստանջյանը դիմել է  ՀՀ արտաքին գործերի ու պաշտպանության նախարարներին, ՀՀ-ում ՌԴ դեսպանին ու Գյումրիի թիվ 102-րդ ռուսական ռազմաբազայի ղեկավարներին Փանիկ գյուղում առանց տեղի բնակչությանը զգուշացնելու զորավարժություններ իրականացրելու հարցի առնչությամբ տեղեկություն ստանալու համար:

ՀՀ Արտաքին գործերի նախարար

Զոհրաբ Մնացականյանին

ՀՀ Պաշտպանության նախարար

Դավիթ Տոնոյանին

Գյումրիի թիվ 102-րդ ռուսական ռազմաբազայի ղեկավարներին

Ռուսաստանի Դաշնության արտակարգ և լիազոր դեսպան

Սերգեյ Կոպիրկինին

Ելից 360/07

18.07.2018թ.

Տեղեկատվություն ստանալու մասին հարցում

Հարգելի՛ լիազոր մարմնի ներկայացուցիչներ,

2018 թվականի հուլիսի 17-ին, ժամը 11:00-ից 12:00-ն ընկած ժամանակահատվածում, Ռուսաստանի Դաշնության 102-րդ ռազմաբազայի ստորաբաժանումներն առանց զգուշացման և առանց թույլտվության, տանկերով և զինվորական այլ տեխնիկայով մտել են Շիրակի մարզի Փանիկ գյուղ և առանց տեղի բնակչությանը զգուշացնելու՝ զորավարժություններ իրականացրել, որի ընթացքում հնչել են ինքնաձիգի կրակահերթեր և պայթյուններ: Բնակիչները, տեսնելով իրենց տների մոտ զինվորական տեխնիկա և կրակահերթեր արձակող ռուս զինվորների, խուճապի են մատնվել և հեռացել իրենց տներից: Կրակոցների հետևանքով երեխա է ուշագնաց եղել: Ռուսական ռազմաբազայի ստորաբաժանումների նման գործողությունները բնակչության շրջանում զայրույթ ու վրդովմունք են առաջացրել: Վերջիններս պահանջել են 102-րդ ռազմաբազայից՝ պատասխան տալ այդ գործողությունների համար:

Ելնելով վերոգրյալից և ղեկավարվելով «Տեղեկատվության ազատության մասին» ՀՀ օրենքի 6-րդ հոդվածի պահանջներով՝ խնդրում եմ տեղեկատվություն տրամադրել հետևյալի մասին.

1. Ի՞նչ իրավական ընթացակարգերի հիման վրա է իրականացվել զորավարժությունները,
2. Ի՞նչու այս մասին նախապես տեղյակ չեն եղել բնակիչները, ՀՀ Արտաքին գործերի նախարարությունը և ՀՀ Պաշտպանության նախարարությունը,
3. Ի՞նչ միջոցներ եք ձեռնարկում, որպեսզի գյուղացիների զայրույթը մեղմեք և պաշտոնապես ներողություն խնդրեք,
4. Ո՞վ և ե՞րբ է պաշտոնապես պատրաստվում ներողություն խնդրելու, զորավարժությունների պատճառով գյուղացիներին հոգեբանական անհանգստություն պատճառելու համար:
5. Եթե պատրաստվում  եք  ներողություն  խնդրել, ապա  խնդրում  եմ այդ մասին նախօրոք  ծանուցել ՀՀ բոլոր քաղաքացիներին:

Հարգանոք՝

Զարուհի Փոստանջյան

Երևանի ավագանու  «Երկիր Ծիրանի» խմբակցության ղեկավար