«Զեյթուն» ուսանողական հանրակացարանը կվերանորոգվի․ ուսանողների թիվը կկրկնապատկվի․ նախարար․ ՏԵՍԱՆՅՈՒԹ

ԱԺ-Կառավարություն հարցուպատասխանի ժամանակ, դիմելով ԿԳՄՍ նախարար Ժաննա Անդրեասյանին, «Քաղաքացիական պայմանագիր» խմբակցության պատգամավոր Գևորգ Պապոյանը հարց ուղղեց անշարժ գույքի վարձակալության պայմաններում ուսանողական հանրակացարանների վիճակի մասին:

«Հանրակացարանները և ուսանողների կեցությունը ընդհանուր առմամբ համակարգային խնդիր են, և երկարաժամկետ կտրվածքով այդ հարցը լուծվելու է Ակադեմիական քաղաքի շրջանակներում, որտեղ նախատեսված է ամբողջական համալիր, որտեղ նաև ուսանողների ու դասախոսների կեցության հնարավորություններ են լինելու»,- նշեց Ժաննա Անդրեասյանը:

Նախարարը հիշեցրեց Զեյթունի ուսանողական հանրակացարանի մասին․ «Այն այս պահին լավ վիճակում չի գտնվում, և բյուջեով պլանավորված է դրա վերանորոգման աշխատանքը, որը թույլ կտա կրկնապատկել այնտեղ կեցություն ունենալու հնարավորությունը: Եթե այս պահին շուրջ 200 ուսանող է կարողանում այստեղ իրենց կեցությունը ապահովել, ապա արդեն 400 ուսանողների համար սա կլինի նորմալ հանրակացարան:

Բայց նաև մեր բուհերում տարեցտարի ավելանում է օտարերկրյա ուսանողների թիվը: Մեր ռազմավարության թիրախ է օտարերկրյա ուսանողների առնվազն կրկնապատկումը. ուստի առաջնահերթ մեր աշխատանքների թիրախում է Ակադեմիական քաղաքի հետ կապված աշխատանքները տեմպով իրականացնելը»:

Վերանորոգման ժամկետների վերաբերյալ Ժաննա Անդրեասյանը նշեց, որ նախագծման գործընթացն արդեն ավարտվել է․ «Մենք շինարարության փուլի պետք է գնանք, և հունվարից ֆինանսավորումը պլանավորված է»։

Ինչ վերաբերում է մեր մարզաբնակ ուսանողներին, նախարարը հիշեցրեց Կառավարության ևս մեկ ծրագիր, որը մեկնարկել է այս տարվա սեպտեմբերից․ «Կրթաթոշակի նոր մոտեցումն է, որով մասնավորապես այս պահին մանկավարժական ուղղություններով բնագիտական ուղղությունների ուսանողների համար ստեղծվել է առնվազն 70 հազար դրամ ամսական կրթաթոշակի հնարավորություն, որը թույլ կտա նաև սոցիալական խնդիրներին ուղղել այդ միջոցները, և դա կընդլայնի կեցությունն ապահովելու նրանց հնարավորությունները»:

Մանրամասները՝ տեսանյութում։