Ո՞ւմ արյամբ եք ուզում փոփոխություն անել. ՔՊ–ական պատգամավորը՝ Մամիջանյանին․ ՏԵՍԱՆՅՈՒԹ

«Քաղաքացիական պայմանագիր» խմբակցության պատգամավոր Ծովինար Վարդանյանն ԱԺ նիստում արձագանքեք ԱԺ «Պատիվ ունեմ» խմբակցության ղեկավար Հայկ Մամիջանյանի այսօրվա հայտարարությանը:

Հիշեցնենք, Մամիջանյանը լրագրողների հետ ճեպազրույցում նշել էր. «Երևանը փոխվելու է մեր բոլորի, դրսում կանգնած քաղաքացիների, հայրենասերների քրտինքով, և եթե Փաշինյանն անմտություն անի՝ նաև արյամբ»:
«Լրահոսում աչքովս ընկավ, որ ԱԺ պատգամավորներից մեկը ԱԺ միջանցքներերից մեկում ճեպազրույց էր տալիս եւ բացի այն, որ ինչ-որ խորհրդավորություն էր հաղորդում իր խոսքերին, եւ փորձում էր նաեւ երկիմաստություն մտցնել, խորիմաստ դեմքով ինչ-որ բաներ էր ակնարկում ժողովրդին, նա չխորժեց հանդես գալ բռնության կոչով՝ ասելով, որ արյամբ է փոխվելու Երեւանը:

Պարոն պատգամավոր, ո՞ւմ արյամբ եք պատրաստվում փոփոխություն անել, արդյոք ՀՀ քաղաքացին ձեզ համար ռեսո՞ւրս է ընդամենը` ձեր անձնական շահն ու նկրտումները իրականություն դարձնելու համար:

Ես կարծում եմ՝ ՀՀ ամեն մի քաղաքացու արյուն պետք է թանկ լինի Հայաստանի ԱԺ պատգամավորի համար: Ես հասկանում եմ ձեր աշխատելաոճը, ապրելաոճը՝ կեղտոտ ջրում ձուկ որսալու, դրա համար ձեր բոլոր խոսափողերը միացված են, տարբեր մարդիկ տարբեր հարցազրույցներ ու ճեպազրույցներ են տալիս: Նաեւ հասկանում եմ՝ ինչից է դա գալիս, որովհետեւ բանաձեւի արդյունքում մանդատ շահած պատգամավորը գուցե չի հասկանում քաղաքացու եւ իր մանդատի միջեւ եղած կապը»», – ասաց Վարդանյանը՝ Մամիջանյանին խորհուրդ տալով այնպես անել, որ ՀՀ քաղաքացին կիսի իր կարծիքը:

Մանրամասները՝ տեսանյութում։