Փորձ ենք անում քաղաքական հայտարարություններով կառավարել Ադրբեջանի ուժային սցենարները.Նիկոլ Փաշինյան

Պրահայի համաձայնությունը ձեռք է բերվել այն բանից հետո, երբ արձանագրվել է, որ ՌԴ առաջարկությունն այլևս ակտուալ չէ. Ադրբեջանը մերժել է այն, և ՌԴ-ն այդ մերժման բերումով այլևս հիմքեր չունի այն պնդելու: Այս մասին Հանրային ՀԸ «Հարցազրույց» հաղորդման եթերում նշել է ՀՀ վարչապետ Նիկոլ Փաշինյանը` անդրադառնալով «Խովաևի պլանին»:

«Երբ այդ առաջարկությունը եղել է,  դրանից առաջ ՌԴ-ն երկու անգամ առնվազն ամենաբարձր մակարդակներով արձանագրել է, որ ԼՂ-ն Ադրբեջանի տարածքային ամբողջականության շրջանակներում է: Պրահայի պայմանավորվածությունը և որևէ պայմանավորվածություն չեն չեղարկել 2020 թ. նոյեմբերի 9-ի եռակողմ պայմանավորվածությամբ կողմերի վրա դրված պարտավորությունները»,- ասաց նա:

Վարչապետը նշեց` պետք է անդրադառնալ մի հարցի` արդյոք այդ հայտարարությունն ուժի մեջ է, թե՝ ոչ, միաժամանակ հաստատելով` ակնհայտորեն ուժի մեջ է:

«Այդ հայտարարությունը որևէ կերպ չի չեղարկել և չէր կարող չեղարկել Ալմաթիի հռչակագիրը, քանի որ այն, ըստ էության, և ՀՀ, և ՌԴ, և Ադրբեջանի և ԱՊՀ մյուս երկրների անկախության հռչակագիրն է` արդեն դե յուրե փոխադարձաբար ճանաչելու իմաստով: Մենք ինչ խնդիրներ որ ունենք, Լաչինի միջանցքը նոյեմբերի 9-ի հայտարարությամբ հաստատված ինստիտուտ է, այնտեղ սահմանված են կողմերի իրավունքները և պարտականությունները: Եռակողմ հայտարարությունը շարունակում է մնալ ուժի մեջ»,- ասաց վարչապետը:

Վարչապետ Նիկոլ Փաշինյանը պնդում է` Հայաստանը ճանաչում է Ադրբեջանի` 86 հազար 600 քառակուսի կմ տարածքային ամբողջականությունը, որի մեջ է նաև Արցախը:

«Ինձ հարց է հնչել` արդյոք 86 հազար 600 քառակուսի կմ-ի մեջ մտնո՞ւմ է  Լեռնային Ղարաբաղը, ես ասել եմ` այո»,- ասաց Փաշինյանը և պարզաբանեց, որ իր այս հայտարարությամբ Հայաստանը փորձել է արձանագրել իրադրության ու ճգնաժամի լուծման ճարտարապետության մասին պայմանավորվածությունը, ինչ պայմանավորվել են Ադրբեջանի հետ:

«Ադրբեջանը միշտ չէ, որ ցույց է տալիս հավատարմությունը պայմանավորվածություններին»,- նշեց նա։

Ըստ Փաշինյանի` Ադրբեջանն ի ցույց է դրել հարցերը ուժային ճանապարհով լուծելու իր մոտեցումը, և Հայաստանը փորձ է անում քաղաքական հայտարարություններով ինչ-որ կերպ կառավարել ուժային սցենարները:

«Մենք ուզում ենք անել ու տեղավորվել այնպիսի ձևակերպումների մեջ, որ Հայաստանի  դիրքորոշումների լեգիտմությունը լինի անխոցելի»,- ասաց Նիկոլ Փաշինյանը:

Մանրամասները՝ տեսանյութում։