07.10.2026 | 14:45
Արմավիրի մարզում հրդեհային անվտանգության խախտումների պատճառով 4 գազաբենզալցակայան կապարակնքվել է
Հզոր երկրաշարժից հետո Մարոկկոն օգնություն է ընդունել չորս երկրից
Քաղաքականություն
11.09.2023 | 23:04
Հզոր երկրաշարժից հետո Մարոկկոյի իշխանությունները հայտարարել են իրենց պատրաստակամության մասին՝ ընդունելու չորս «բարեկամ երկրների»՝ Իսպանիայի, Կատարի, Մեծ Բրիտանիայի և Արաբական Միացյալ Էմիրությունների օգնությունը։ Այս մասին հայտնել է երկրի ՆԳՆ-ն, փոխանցում է DW-ի ռուսական ծառայությունը։
Նշված երկրների փրկարար ծառայությունների ներկայացուցիչներն արդեն կապ են հաստատել հյուսիսաֆրիկյան թագավորության իրենց գործընկերների հետ, գրում է dpa գործակալությունը։
Նախկինում շատ երկրներ են օգնություն առաջարկել երկրաշարժից տուժած երկրին, այդ թվում՝ ԱՄՆ-ն ու Գերմանիան, ինչպես նաև ամբողջ Եվրամիությունը:
Վերջին տվյալներով՝ Մարոկկոյում տեղի ունեցած երկրաշարժի հետևանքով զոհվել է առնվազն 2122 մարդ, ևս 2421-ը վիրավորվել է։ Նախօրեին ողբերգության կապակցությամբ Մարոկկոյի թագավորական դատարանը երկրում եռօրյա սուգ է հայտարարել։
Սեպտեմբերի 9-ի գիշերը Մարոկկոյում տեղի է ունեցել 6,8 մագնիտուդով երկրաշարժ։ Երկրի ազգային երկրաֆիզիկական ինստիտուտը հայտնել է, որ երկրաշարժի էպիկենտրոնը գտնվել է Մարաքեշ-Սաֆի լեռնային շրջանում՝ Մարաքեշից 70 կմ հարավ-արևմուտք: ԱՄՆ Երկրաբանական ծառայության տվյալներով էլ՝ օջախը գտնվել է 18,5 կիլոմետր խորության վրա։
Սա Մարոկկոյում վերջին 60 տարում ամենաուժեղ երկրաշարժն է, նշում է dpa-ն։
