Վախկոտություն էր Սամվել Շահրամանյանին չշնորհավորելը. Տիգրան Աբրահամյանը՝ ՀՀ իշխանության մասին

«Վերջին մեկ շաբաթվա ընթացքում Հայաստանի ու Ռուսաստանի իշխանությունների տարբեր դեմքերի միջև հայտարարությունների փոխհրաձգությունը ցույց է տալիս լարվածության այն աստիճանը, նաև այն վտանգավոր հետևանքները, որը կարող է ունենալ Հայաստանի համար»,- ԱԺ-ում լրագրողների հետ ճեպազրույցում այս մասին նշեց ԱԺ «Պատիվ ունեմ» խմբակցության քարտուղար Տիգրան Աբրահամյանը։

Պատգամավորի խոսքով՝ որքանով էլ այդ հարաբերությունները լարված լինեն, պետք է հաշվի առնել այն հանգամանքը, որ Ռուսաստանը տարածաշրջանում գլխավոր դերակատարն է, անկախ այն հանգամանքից, թե ով ինչ դերակատարում ունի, և, բնականաբար, բոլոր գործընթացներում ունի ազդեցություն։

Անդրադառնալով Արցախում նախագահի ընտրությանը, Տիգրան Աբրահամյանն ընդգծեց, որ ստեղծված իրավիճակում Արցախի նորընտիր նախագահն ունի բոլորովին այլ կարգավիճակ ու այլ մարտահրավերների առջև է կանգնած, ինչպիսին Արցախում որևէ նախագահ չի ունեցել։

«Պետք էր մեծ խիզախություն ունենալ, որպեսզի այս ծանր իրավիճակում ստանձնել Արցախի Հանրապետության ղեկը։ Ինքս Սամվել Շահրամանյանին ճանաչելով կարող եմ ասել, որ քաղաքական որևէ ամբիցիա չի դրսևորել, իրեն երբեք այս ու այն կողմ չի նետել՝ այդ պաշտոնում առաջադրելու համար, այլ եղել է բավականին մեծ հասարակական-քաղաքական կոնսենսուս, առկա իրավիճակը հաշվի առնելով՝ Սամվել Շահրամանյանն ընդունել է այդ առաջարկը։ Այս պահին շատ ծանր առաքելություն է դրված նրա ուսերին, նրա ու Արցախի հաջողության համար միայն նա բավարար չէ, պետք է Հայաստանում, Արցախում ու Սփյուռքում մեծ համախմբում լինի նրա շուրջ»,- նշեց պատգամավորը՝ հավելելով՝ իրավիճակը բոլոր ճակատներում չափազանց ծանր է՝ սկսած հումանիտարից, մինչև առաջնագիծ, ու բանակցային գործընթացով ավարտած։

Տիգրան Աբրահամյանի դիտարկմամբ՝ ՀՀ իշխանության կողմից Սամվել Շահրամանյանին չշնորհավորելը վախկոտություն է․« Սա ինքնին ամրապնդում է այն մոտեցումը, որ Արցախի հարցով ՀՀ իշխանության մոտեցումներն անփոփոխ են․ պատրաստ են ճանաչել Արցախը Ադրբեջանի կազմում»։

Մանրամասները՝ տեսանյութում։