Իրանի ԶՈՒ պատվիրակությունը Բաքվում այցելել է ռազմավարի պուրակ և անվտանգային հարցեր քննարկել

Բաքվում էր իրանական Զինված ուժերի պատվիրակությունը՝ մասնակցելու Ադրբեջանի և Իրանի Իսլամական Հանրապետության ԶՈՒ գլխավոր շտաբերի ռազմական համագործակցության համատեղ հանձնաժողովի 3-րդ նիստին։ Այն տեղի է ունեցել սեպտեմբերի 9-ին։

Նիստից զատ՝ գեներալ-մայոր Մուհամմեդ Ահադիի գլխավորությամբ իրանական պատվիրակությունը նաև մի շարք հանդիպումներ է ունեցել տարբեր պաշտոնյաների, այդ թվում՝ Ադրբեջանի ՊՆ ղեկավար Զաքիր Հասանովի հետ։

Հանդիպման ընթացքում Հասանովը Հայաստանի ԶՈՒ-ին և Արցախի ՊԲ-ին սադրանքների մեջ է մեղադրել։ Ըստ ադրբեջանական կողմի հաղորդագրության՝ «իրական կողմը մտահոգություն է հայտնել Հայաստանի գործողությունների առնչությամբ, որոնք կարող են վտանգել տարածաշրջանում կայունությունն ու անվտանգությունը»։ Նաև մտքերի փոխանակություն է տեղի ունեցել երկու երկրների միջև ռազմական համագործակցության զարգացման հեռանկարների, տարածաշրջանային անվտանգության հարցերի շուրջ։

Ի դեպ, նախօրեին ավարտվել է համատեղ հանձնաժողովի 3-րդ նիստը։

Իրանական պատվիրակությունը նաև այցելել է Ադրբեջանի նախագահ Իլհամ Ալիևի ստեղծած, այսպես կոչված, ռազմավարի պուրակ, որտեղ ցուցադրվում են զոհված հայ զինծառայողների սաղավարտները, ինչպես նաև զինվորների մանեկենները՝ նվաստացուցիչ կերպարներով:

Ադրբեջանական լրատվամիջոցների հետ զրույցում իրանցի գեներալը նշել է, որ տեղեկությունները, թե Իրանը զորք է կուտակում Ադրբեջանի հետ սահմանին, անհիմն են։

Էմմա Չոբանյան